متحدہ عرب امارات سے خصوصی پیغام میں نگران وزیراعظم نے کہا کہ معاہدوں سے پاکستان اور متحدہ عرب امارات کے درمیان اقتصادی تعاون کے نئے دور کا آغاز ہوا ہے۔
انہوں نے کہا کہ علاقائی استحکام اور تزویراتی تعاون کے حوالے سے دونوں ممالک کے درمیان تعلقات کے نئے باب کا آغاز ہوا ہے۔
وزیراعظم نے کہا کہ وہ پاکستان اور متحدہ عرب امارات کے عوام کو دوستی اور تعاون کے نئے دور کے آغاز پر مبارکباد پیش کرتے ہیں۔
انوارالحق کاکڑ نے کہا کہ شیخ زید بن سلطان النہیان نے 70 کی دہائی میں پاکستان اور متحدہ عرب امارات کے درمیان ایک نئے دور کا آغاز کیا۔
A special message of PM @anwaar_kakar after signing of multi-billion dollar deals with the UAE. pic.twitter.com/FH9SCjaxjx
— Murtaza Solangi (@murtazasolangi) November 27, 2023
انہوں نے کہا کہ آج شیخ محمد بن زیدال نہیان نے دو طرفہ تعلقات کو ایک نئی جہت دی ہے، آرمی چیف نے دونوں ممالک کے درمیان تعاون کی یادداشت پر دستخط کی تقریب میں بھی شرکت کی۔
انوار الحق کاکڑ نے کہا کہ معاہدوں پر دستخط کی تقریب میں وفاقی وزراء اور متحدہ عرب امارات کے وزراء نے بھی شرکت کی، ان معاہدوں کے معیشت پر مثبت اثرات جلد سامنے آئیں گے۔
پاکستان اور متحدہ عرب امارات کے درمیان توانائی، پورٹ آپریشنز کے منصوبوں، گندے پانی کی صفائی، فوڈ سیکیورٹی، لاجسٹکس، معدنیات اور بینکنگ اور مالیاتی خدمات کے شعبوں میں سرمایہ کاری کے تعاون پر مفاہمت کی یادداشتوں پر دستخط کیے گئے۔
متحدہ عرب امارات پاکستان میں 20 سے 25 ارب ڈالر کی سرمایہ کاری کرے گا، اس تاریخی سرمایہ کاری سے پاکستان میں معاشی استحکام کی راہ ہموار ہوگی، سرمایہ کاری سے خصوصی سرمایہ کاری سہولت کونسل (SIFC) کے تحت مختلف اقدامات کی تکمیل میں بھی مدد ملے گی۔
