اردوورلڈ کینیڈا ( ویب نیوز)پاکستان تحریک انصاف (پی ٹی آئی) کے وائس چیئرمین شاہ محمود قریشی نے نگرا ن وزیراعظم کے لیے انوار الحق کاکڑ کے انتخاب پر ردعمل کا اظہار کرتے ہوئے کہا ہے کہ انوار الحق کاکڑ نہ تو مسلم لیگ ن کا انتخاب ہیں اور نہ ہی ان کا انتخاب پیپلز پارٹی نے کیاہے۔

اپنے ایک بیان میں انہوں نے کہا کہ انوارالحق  کاکڑ کی تعیناتی سے ثابت ہوتا ہے کہ مسلم لیگ ن اور پیپلز پارٹی کی خواہش پوری نہیں ہوئی، معاملہ الیکشن کمیشن میں جاتا تو بھی ایسا ہی ہوتا۔ .

سابق اپوزیشن لیڈر راجہ ریاض پر تنقید کرتے ہوئے شاہ محمود قریشی نے کہا کہ کیا آپ سمجھتے ہیں کہ ملک کے اہم فیصلے راجہ ریاض   کریں گے؟

انہوں نے کہا کہ توقع ہے کہ انوار الحق کاکڑ پی ڈی ایم کا رویہ نہیں اپنائیں گے اور ملک میں آزادانہ اور منصفانہ انتخابات کرائیں گے۔

شاہ محمود قریشی کا مزید کہنا تھا کہ ہمارا کسی ادارے سے کوئی تنازع نہیں، دیکھنا ہوگا کہ ملکی مفاد کو کیسے آگے بڑھایا جائے۔

یاد رہے کہ بلوچستان عوامی پارٹی کے رہنما انوار الحق کاکڑ کو نگراں وزیراعظم بنانے کا فیصلہ کیا گیا تھا، جس کی سمری پر صدر مملکت نے دستخط کر دیے ہیں۔ نگران وزیراعظم انوارالحق کاکڑ 14 اگست کو یوم آزادی پر حلف اٹھائیں گے۔