اردوورلڈ کینیڈا ( ویب نیوز )عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ 24 ارکان اسمبلی کی جانب سے ایک گھنٹے میں 29 بلوں کی منظوری جمہوریت نہیں مجبوری ہے۔
سماجی رابطے کی ویب سائٹ ٹوئٹر پر اپنے بیان میں شیخ رشید نے کہا کہ اسحاق ڈار کے نگران وزیراعظم کے لانچنگ پیڈ کو ابھی ہوا میں نہیں چھوڑا جاسکا کیونکہ ابھی اس میں ایندھن مکمل نہیں بھرا گیا۔ وہ چاہتے ہیں کہ نگران حکومت ان کی قائم مقام حکومت ہو، لیکن ایسا نہیں ہوگا۔
اسحاق ڈار کا نگران وزیراعظم کا لانچنگ پیڈ ابھی تک فضاء میں نہیں چھوڑا جاسکا کیونکہ اُس میں فیول ابھی پورا نہیں بھرا جاسکا برادر یوسف شہبازشریف وکٹ کے دونوں طرف کھیل رہے ہیں ان کی خواہش ہے کہ نگران حکومت اُن کی قائم مقام حکومت ہو لیکن ایسا نہیں ہوسکے گا ایک گھنٹے میں 29 بلوں کی 24…
— Sheikh Rashid Ahmed (@ShkhRasheed) July 28, 2023
انہوں نے کہا کہ 24 رکنی اسمبلی سے ایک گھنٹے میں 29 بلوں کی منظوری جمہوریت نہیں مجبوری ہے۔ یکم اگست سے سیاست فیصلہ کن مراحل میں داخل ہو جائے گی، ترمیم آئین سے کھلا تصادم ہے، عدلیہ اس کا نوٹس لے سکتی ہے، عدلیہ کو خاموش تماشائی نہیں بننا چاہیے۔
سابق وفاقی وزیر نے کہا کہ نہ صرف چادر اور دیوار کو تباہ کیا گیا بلکہ بچوں اور حاملہ خواتین کو بھی گھروں سے اٹھا کر غائب کیا گیا۔ یہ پاکستان کی تاریخ کا سیاہ ترین دور ہے۔ لیکن وقت آنے پر یہ حکومت سود کے ساتھ واپس کرے گی
انہوں نے کہا کہ نگران وزیراعظم کے لیے جتنے بھی نام مارکیٹ میں آرہے ہیں وہ مراحل میں رہ جائیں گے، کسی کو غلط فہمی نہیں ہونی چاہیے، یہ فیصلہ الیکشن کمیشن میں بھی جا سکتا ہے، نواز شریف پاکستان آنے کے بجائے اپنے امیدوار کا نام لیکر لندن روانہ ہو گئے ہیں اور سب سے اہم بات یہ ہے کہ حکومت نے منی لانڈرنگ اور کرپشن کے تمام کیسز ختم کر دیے ہیں۔
عوامی مسلم لیگ کے سربراہ کا مزید کہنا تھا کہ حکومت نے آئین، قانون اور عدلیہ کے فیصلے کو نہیں مانا اور جس تیزی سے نگران حکومت کے اختیارات میں آئین کے برعکس ترمیم کی گئی اس سے عوام کے ذہنوں میں شکوک و شبہات پیدا ہوئے۔ جو حکومت 50 گاڑیوں کے پروٹوکول کے بغیر گھر سے نہیں نکل سکتی وہ عوام کے پاس ووٹ مانگنے کیسے جائے گی؟
