اردوورلڈ کینیڈا( ویب نیوز)وزیر اعلیٰ پنجاب مریم نواز نے کہا ہے کہ سانحہ اے پی ایس نے سبق سکھایا ہے کہ دہشت گردی کا خاتمہ ناگزیر ہے۔

سانحہ اے پی ایس کی 10ویں برسی پر اپنے پیغام میں وزیراعلیٰ پنجاب مریم نواز نے سانحہ آرمی پبلک سکول کے شہداء کو خراج عقیدت پیش کیا۔
مریم نواز نے کہا کہ سانحہ آرمی پبلک سکول پشاور کو دس سال گزر گئے لیکن زخم ابھی تازہ ہیں۔ 16 دسمبر 2014 کی سیاہ صبح ہر پاکستانی کے دل میں نقش ہے۔ دہشت گردوں نے 147 معصوم بچوں اور ان کے اساتذہ کو بے دردی سے نشانہ بنایا۔
انہوں نے کہا کہ علم کی روشنی سے اس ملک کے مستقبل کو روشن کرنے کے خواہشمند نوجوان طلباء ظلم کا نشانہ بنے۔ 16 دسمبر کا سانحہ نہ صرف سکول پر حملہ تھا بلکہ انسانیت، تعلیم اور پاکستان کے روشن مستقبل پر بھی حملہ تھا۔
وزیراعلیٰ پنجاب نے مزید کہا کہ اے پی ایس کے شہداء ہماری قوم کے ہیرو ہیں، شہداء کے والدین اور اہل خانہ کا حوصلہ اور صبر قابل تحسین ہے، سانحہ اے پی ایس کے 147 شہداء کا خواب ایک بہتر پاکستان تھا ۔