اردوورلڈ کینیڈا( ویب نیوز)سابق صدر ڈاکٹر عارف علوی نے مولانا فضل الرحمان سے ملاقات میں عمران خان کا اہم پیغام پہنچایا ہے۔ذرائع کے مطابق پی ٹی آئی کے بانی عمران خان نے عارف علوی کے ذریعے مولانا فضل الرحمان کو پیغام پہنچایا کہ حکومت عدلیہ کو ختم کرنا چاہتی ہے جسے اپوزیشن نے مل کر ناکام بنایا، ہم آپ کے کردار کو سراہتے ہیں۔
ذرائع کا کہنا ہے کہ عمران خان نے مولانا فضل الرحمان کو عوامی جمہوری مسائل پر ایک ساتھ کھڑے ہونے کا پیغام دیا، ملاقات میں ڈاکٹر عارف علوی نے مولانا فضل الرحمان اور ان کی جماعت کا شکریہ ادا کیا۔
معتبر ذرائع کا کہنا ہے کہ اس موقع پر عارف علوی نے کہا کہ یہ آئینی بل عوام کے بنیادی حقوق سے انکار کی کوشش ہے، حکومت نے آئینی ترمیمی بل کی آڑ میں آئین پاکستان پر حملہ کیا ہے۔
ذرائع کا مزید کہنا ہے کہ مولانا فضل الرحمان نے ترمیمی بل کے معاملے پر اپوزیشن کو ساتھ لے کر چلنے کی یقین دہانی کرائی ہے اور کہا ہے کہ اب مشاورت کے بعد ہی فیصلہ کیا جائے گا۔
معتبر ذرائع کی جانب سے یہ دعویٰ بھی کیا گیا ہے کہ ملاقات میں دونوں جماعتوں کے درمیان ورکنگ ریلیشن شپ کو مزید بڑھانے پر اتفاق کیا گیا۔