آرمی چیف جنرل سید عاصم منیر کا جنرل سٹاف ہیڈ کوارٹرز پہنچنے پر پرتپاک استقبال اور گارڈ آف آنر پیش کیا گیا۔ آرمی چیف نے آذربائیجان کے صدر، وزیر دفاع، چیف آف جنرل اسٹاف، فضائیہ کے کمانڈر سے بھی ملاقات کی۔
جنرل عاصم منیر نے آذربائیجان کی مسلح افواج کی آپریشنل تیاریوں اور حوصلے کو سراہا، ملاقات میں دونوں ریاستوں اور مسلح افواج کے درمیان باہمی تعاون کو نئی سطح تک بڑھانے کے عزم کا اظہار کیا گیا، پاکستان کی جانب سے آذربائیجان کی سیاسی و عسکری قیادت کی تعریف کی گئی
ملاقات کے دوران آذربائیجان کے صدر الہام علیوف نے کہا کہ دونوں ممالک کے درمیان مختلف شعبوں میں دوستانہ تعلقات کامیابی سے فروغ پا رہے ہیں، ان تعلقات میں فوجی تعاون بھی شامل ہے۔
انہوں نے کہا کہ آذربائیجان اور پاکستان کے درمیان دفاعی صنعت میں کامیاب تعاون قابل ستائش ہے، انہوں نے کہا کہ دونوں ممالک کے درمیان مشترکہ فوجی تربیت کا انعقاد ضروری ہے۔
صدر الہام علیوف نے کہا کہ آذربائیجان جموں و کشمیر کے معاملے پر برادر ملک پاکستان کی ہمیشہ حمایت کرتا ہے، آرمی چیف جنرل عاصم منیر کا دورہ باہمی تعاون کو مضبوط بنانے میں معاون ثابت ہوگا۔
