283
اردو ورلڈ کینیڈا ( ویب نیوز )سینئر صحافی ارشد شریف کی والدہ نے چیئرمین پی ٹی آئی کو ارشد شریف کے قتل ازخود نوٹس کیس کی تحقیقات کی درخواست دائر کردی۔
ایڈووکیٹ شوکت عزیز صدیقی کی جانب سے دائر متفرق درخواست میں ارشد شریف کی والدہ نے موقف اختیار کیا ہے کہ پی ٹی آئی چیئرمین فیصل واوڈا، سلمان اقبال، مراد سعید اور عمران ریاض سے تفتیش کی جائے۔
درخواست میں استدعا کی گئی ہے کہ ان تمام افراد سے ارشد شریف کے قتل سے متعلق شواہد حاصل کیے جائیں۔ ارشد شریف کی والدہ نے الگ درخواست میں مزید کہا کہ وہ کیس کی حساسیت اور اہمیت کے پیش نظر سپریم کورٹ کے اقدام کو سراہتی ہیں۔
ارشد شریف کی والدہ کا کہنا تھا کہ قتل کی تحقیقات پاکستان میں سازش سے شروع کی جائیں۔ کئی لوگوں نے ارشد شریف کے قتل کی سازش کے بارے میں جاننے کا دعوی کیا ہے۔ انہوں نے کہا کہ نہ تو فیکٹ فائنڈنگ کمیٹی کی رپورٹ دی گئی اور نہ ہی جے آئی ٹی کی رپورٹ۔
سپریم کورٹ سے استدعا ہے کہ جے آئی ٹی سربراہ کو 5 افراد کو تحقیقات میں شامل کرنے کا حکم دیا جائے۔ ساتھ ہی عدالت جے آئی ٹی کی رپورٹس فراہم کرنے کا بھی حکم دے۔
