اردوورلڈ کینیڈا ( ویب نیوز)چیف جسٹس سپریم کورٹ جسٹس عمر عطا بندیال نے کہا ہے کہ آئین کا آرٹیکل 25 وسائل کی منصفانہ تقسیم سے متعلق ہے، حکومت کی جانب سے دی جانے والی سبسڈی سپریم کورٹ ہی دیکھ سکتی ہے کہ یہ سبسڈی بلا امتیاز ہے یا نہیں۔
اسلام آباد میں تقریب سے خطاب کرتے ہوئے چیف جسٹس نے کہا کہ سپریم کورٹ میں بیٹھ کر ہم آئین کے مطابق قانون دیکھتے ہیں ۔
چیف جسٹس نے کہا ہے کہ آئین کا آرٹیکل 25 وسائل کی منصفانہ تقسیم سے متعلق ہے، ہر شعبہ سبسڈی مانگتا ہے اور سبسڈی حکومت دیتی ہے۔ سپریم کورٹ ہی دیکھ سکتی ہے کہ یہ سبسڈی غیر امتیازی ہے یا نہیں۔
چیف جسٹس نے کہا کہ کمرشل انٹیگریٹی اور ریگولیٹری اقدامات درست ہونے چاہئیں، ٹیکس اور کسٹم ڈیوٹی لگتی ہے اور لوگوں کو معلوم نہیں، حکومت تاجروں کی مشاورت سے معاملات چلائے۔

جسٹس عمر عطا بندیال نے کہا کہ آئی پی پیز کو طویل مدتی سرمایہ کاری کی یقین دہانی کرائی گئی، طویل مدتی سرمایہ کاری کے لیے سرمایہ کاروں کو سہولیات فراہم کرنا ضروری ہے۔
چیف جسٹس پاکستان نے کہا کہ میں آرٹیفیشل انٹیلی جنس کے شعبے کا ماہر نہیں، یہ تقریب ملک میں کاروبار کی ترقی کے لیے منعقد کی گئی ہے، سپریم کورٹ میں صرف قانون کے نفاذ کا معاملہ ہے، بار بار تشریح قانون کے تنازعہ پیدا ہونے کی وجہ سے ماہرین کو قانون کی تشریح کرکے تنازعہ کو حل کرنا ہوگا، ایک قانون کی دو تشریحات مسائل پیدا کرتی ہیں۔
جسٹس عمر عطا بندیال نے کہا کہ مارکیٹ میں ججز آسانی سے دستیاب نہیں اور بہت سے امتحانات دینے پڑتے ہیں، ٹربیونلز نہ بننے سے عدالتوں پر بوجھ بڑھتا ہے، ریگولیٹر جو بھی ہو وہ ٹربیونل بنائے، سروس کے معاملات پر سروس ٹربیونلز بنائے گئے ہیں۔
انہوں نے کہا کہ ملک میں نجی کاروبار کو سپورٹ اور حوصلہ افزائی کی ضرورت ہے، کاروباری ترقی سے معاشی ترقی ہوتی ہے، ہمیں بہتر ریگولیٹری نظام کی ضرورت ہے، تجارتی اداروں کے وقار کو بھی مدنظر رکھنا ہوگا۔
چیف جسٹس نے کہا کہ نیب کو ایسی ہاؤسنگ اسٹیٹس کے خلاف کارروائی کرنے کی ضرورت ہے جن کے پاس زمین نہیں، عوام کے لیے ریگولیشنز کو آسان بنانا ضروری ہے، ہائی کورٹس کی کارکردگی بہتر کرنے کی ضرورت ہے