اردوورلڈ کینیڈا( ویب نیوز)انسداد دہشت گردی کی عدالت نے پی ٹی آئی کے احتجاج کے نتیجے میں گرفتار 32 ملزمان کو مقدمات سے بری کر دیا۔
شناختی پریڈ کے لیے بھیجے گئے 32 ملزمان کو رات گئے اسلام آباد کی انسداد دہشت گردی کی عدالت میں پیش کیا گیا۔ کیس کی سماعت اے ٹی سی کے جج ابوالحسنات ذوالقرنین نے کی۔ ملزمان کی جانب سے ان کے وکیل انصار کیانی عدالت میں پیش ہوئے۔
پولیس نے تھانہ آئی نائن اور مارگلہ میں ملزمان کی گرفتاری کی اطلاع دی تاہم ملزمان کو جہلم جیل سے عدالت میں پیش کیا گیا جس پر عدالت برہم ہوگئی۔
سماعت کے دوران پولیس نے موقف اختیار کیا کہ ملزمان کو 25 نومبر کو گرفتار کیا گیا تھا تاہم شناختی پریڈ نہیں ہوسکی، ملزمان کا 30 روزہ جسمانی ریمانڈ منظور کیا جائے۔
ملزمان کے وکلا نے پولیس کی مخالفت کرتے ہوئے کہا کہ ملزمان کی شناخت پریڈ بھی نہیں کرائی گئی اور بازیابی کے لیے پولیس ریمانڈ مانگ رہی ہے۔ پولیس نے کارکنوں کو ان کے گھروں سے اٹھایا اور تعداد پوری کرنے کے لیے احتجاجی کیس میں ڈال دیا۔
بعد ازاں جج ابوالحسنات ذوالقرنین نے کمرہ عدالت میں موجود 32 ملزمان کو کیس سے بری کر دیا، ریمارکس دیتے ہوئے کہا کہ اگر پولیس نے انہیں دوبارہ گرفتار کیا تو پولیس کو ہتھکڑیاں لگیں گی۔
