اردو رولڈ کینیڈا ( ویب نیوز )پاکستان تحریک انصاف کے مرکزی رہنما اور سابق وزیر خزانہ اسد عمر نے کہا ہے کہ عدالتی پیشی کی آڑ میں عمران خان کو قتل کرنے کی سازش ہو رہی ہے۔
میڈیا سے گفتگو کرتے ہوئے پی ٹی آئی رہنما اسد عمر کا کہنا تھا کہ 4 ماہ قبل تک عمران خان عدالت جاتے تھے، عمران خان ایک بار نہیں کئی بار عدالت گئے۔ عمران خان کو کسی عدالت میں پیش ہونے پر کوئی اعتراض نہیں۔
انہوں نے کہا کہ خان صاحب کو جان کو خطرہ ہونے کی اطلاعات ملنا شروع ہوگئیں، آج بھی عمران خان کی جان کو خطرہ ہونے کی تصدیقی اطلاعات مل رہی ہیں، عمران خان پر عدالت میں حملہ ہوسکتا ہے،
اسد عمر کا کہنا تھا کہ سیاسی شخصیات کا قتل ہماری تاریخ کا حصہ ہے، عمران خان لاہور ہائی کورٹ اور جوڈیشل کمپلیکس میں پیش ہوئے، سیکیورٹی انتظامات نظر نہیں آئے، عمران خان اس سے قبل اپنے اوپر قاتلانہ حملے سے متعلق سازش کا بھی ذکر کر چکے ہیں اور جوابی بیانیہ بے نقاب اور اب بھی مصدقہ اطلاعات اور شواہد موجود ہیں کہ عدالتی پیشیوں کی آڑ میں عمران خان کو قتل کرنے کی سازش ہو رہی ہے۔
سابق وفاقی وزیر نے مزید کہا کہ ہر پانچویں گھر میں لوگ بے روزگار ہو چکے ہیں، آج غریب کے ساتھ ساتھ متوسط طبقے کا جینا مشکل ہوتا جا رہا ہے، کاروبار بند ہو رہے ہیں، ملک اس وقت بدترین مہنگائی اور بے روزگاری کا شکار ہے
