اردو ورلڈ کینیڈا ( ویب نیوز ) اسد الدین اویسی جو آل انڈیا مجلس اتحاد المسلمین کے صدر ہی کے لوک سبھا کے رکن کی حیثیت سے حلف اٹھانے کے بعد ، فلسطینیوں کے حق میں ان کے بیان پر سیاسی تنازعہ کھڑا ہوگیا ہے۔این ڈی ٹی وی کی رپورٹ کے مطابق اسد الدین اویسی نے اردو میں رکن پارلیمنٹ کی حیثیت سے حلف اٹھایا اور فلسطین کے ساتھ یکجہتی کا اظہار کیا اور اپنی ریاست تلنگانہ کی تعریف کی اور مسلمانوں کے لیے اپنی پارٹی آل انڈیا مجلس اتحاد المسلمین کے نعرے لگائے۔حلف اٹھانے کے بعد حیدرآباد سے 5 بار رکن پارلیمنٹ منتخب ہونے والے اویسی کے بیان پر حکومتی بنچوں کی جانب سے شدید ردعمل سامنے آیا اور قائم مقام اسپیکر نے ان کے الفاظ کو حذف کردیا۔ہندوستان کی حکمران بھارتیہ جنتا پارٹی (بی جے پی) کے رہنما رادھا موہن سنگھ پارلیمنٹ کے اجلاس کی صدارت کر رہے تھے اور انہوں نے اراکین کو یقین دلایا کہ رسمی حلف نامے کے علاوہ کسی بیان کو ریکارڈ کا حصہ نہیں بنایا جائے گا۔
سپیکر بھرتوبہاری مہتاب نے بھی تصدیق کی کہ صرف حلف یا اثبات کو ہی نوٹ کیا جا رہا ہے۔اسد الدین اویسی نے پارلیمنٹ کے باہر میڈیا سے بات کرتے ہوئے اپنے الفاظ کا دفاع کیا اور کہا کہ دیگر اراکین بھی مختلف باتیں کہتے ہیں، میں نے کہا تھا کہ جے بھیم، جے میم، جے تلنگانہ، جے فلسطین، مجھے آئین کی کوئی شق بتائیں. اس میں کیا حرج ہے۔انہوں نے کہا کہ آپ کو دوسروں کی بات بھی سننی چاہیے، میں نے جو کہنا تھا وہ کہا، یہ بھی پڑھیں کہ مہاتما گاندھی نے فلسطین کے حوالے سے کیا کیا۔جب ان سے فلسطین کے نعرے کے بارے میں پوچھا گیا تو انہوں نے وضاحت کی کہ فلسطینیوں پر ظلم کے پہاڑ توڑے جا رہے ہیں۔بی جے پی ذرائع نے دعویٰ کیا ہے کہ اسد الدین اویسی کو غیر ملکی ریاست فلسطین سے وفاداری کے لیے نااہل قرار دیا جا سکتا ہے۔
وفاقی وزیر شوبھا کرنڈلج نے وزیر داخلہ کے دفتر کو ایک خط لکھا ہے جس میں اویسی کی تقریر پر اعتراض کیا گیا ہے اور کارروائی کا مطالبہ کیا گیا ہے. انہوں نے قائم مقام اسپیکر سے اسد الدین اویسی سے دوبارہ حلف اٹھانے کی درخواست بھی کی ہے۔اس سال کے شروع میں بھی ایسا ہی ایک واقعہ پیش آیا تھا جب عام آدمی پارٹی کی رکن سواتی ملیوال کو بھی حلف برداری کی تقریب کے دوران نعرے لگانے پر دوبارہ حلف اٹھانا پڑا تھا۔اسد الدین اویسی نے دیگر اراکین کے ساتھ آج لوک سبھا کی رکنیت کا حلف اٹھایا، جب کہ بھارتی وزیر اعظم نریندر مودی سمیت اسمبلی کے 262 نومنتخب اراکین نے پیر کو 18ویں لوک سبھا کے افتتاحی اجلاس میں حلف لیا۔
