اردو ورلڈ کینیڈا ( ویب نیوز ) ایشیا کپ 2025 کے انعقاد کی تیاریاں جاری ہیں اور بھارتی میڈیا کے مطابق ٹورنامنٹ 10 ستمبر سے شروع ہونے کا امکان ہے۔
بھارتی میڈیا رپورٹس کے مطابق ایشیا کپ کا آفیشل شیڈول جولائی کے پہلے ہفتے میں جاری کیا جائے گا اور بھارت ٹورنامنٹ کی میزبانی کرے گا۔ایشیا کپ میں پاکستان، بھارت، سری لنکا، بنگلہ دیش، افغانستان اور متحدہ عرب امارات کی ٹیموں کی شرکت متوقع ہے۔میڈیا رپورٹس میں دعویٰ کیا گیا ہے کہ متحدہ عرب امارات (یو اے ای) میں ایشیا کپ کے میچوں کے انعقاد کا بہت زیادہ امکان ہے تاکہ ٹیموں کو غیر جانبدار مقام پر سہولت فراہم کی جا سکے۔مزید برآں، ہندوستانی میڈیا کا کہنا ہے کہ یہ ایونٹ ہائبرڈ ماڈل کے تحت بھی کھیلا جا سکتا ہے، جس کے تحت کچھ میچز ایک ملک میں اور کچھ میچ دوسرے میں ہو سکتے ہیں۔یاد رہے کہ اس سال کے شروع میں بھارت نے سیکیورٹی خدشات کا حوالہ دیتے ہوئے چیمپئنز ٹرافی کے لیے پاکستان آنے سے انکار کر دیا تھا، جس کے بعد ایک ہائبرڈ ماڈل پر اتفاق کیا گیا تھا اور بھارت کے میچز متحدہ عرب امارات میں منعقد کیے گئے تھے۔. پاکستان نے یہ بھی اعلان کیا کہ وہ مستقبل کے ٹورنامنٹس کے لیے اپنی ٹیم بھارت نہیں بھیجے گا۔
