اردوورلڈ کینیڈا( ویب نیوز)اقوام متحدہ میں پاکستان کے مستقل نمائندے عاصم افتخار احمد نے کہا ہے کہ مسئلہ کشمیر کو حل کیے بغیر خطے میں دیرپا امن ممکن نہیں۔

جنوبی ایشیا کی موجودہ علاقائی صورتحال پر عرب گروپ کے سفیروں کو بریفنگ دیتے ہوئے عاصم افتخار احمد نے کہا کہ سندھ طاس معاہدے کی یکطرفہ معطلی اور دیگر جارحانہ ہندوستانی اقدامات اشتعال انگیز ہیں، بین الاقوامی قانون اور اقوام متحدہ کے چارٹر کی سنگین خلاف ورزی ہے۔
انہوں نے سفیروں کو مطلع کیا کہ ہندوستان کے کھلے عام جارحیت پر پاکستان کا ردعمل بین الاقوامی چارٹر کے تحت اپنے دفاع کے حق کو استعمال کرنے میں ایک متناسب اقدام ہے۔
عاصم افتخار احمد نے عرب سفیروں کو مطلع کیا کہ پاکستان جنگ بندی کو برقرار رکھنے اور کشیدگی کو کم کرنے کے لیے تمام ضروری اقدامات کرنے کے لیے پرعزم ہے۔
پاکستانی مندوب نے کہا کہ جموں و کشمیر تنازعہ کو اقوام متحدہ کی سلامتی کونسل کی قراردادوں اور کشمیریوں کی امنگوں کے مطابق حل کیے بغیر جنوبی ایشیا میں دیرپا امن قائم نہیں ہو سکتا۔