آئی سی سی ورلڈ کپ کے فائنل میں آسٹریلوی بلے بازوں ٹریوس ہیڈ اور لابوشین نے شاندار بلے بازی کا مظاہرہ کرتے ہوئے بھارت کے عزائم کو خاک میں ملا دیا اور آسٹریلیا کو ورلڈ کپ 2023 کا ٹائٹل دلوا دیا۔
اتوار کو ورلڈ کپ کا فائنل احمد آباد کے نریندر مودی اسٹیڈیم میں کھیلا گیا، جہاں آسٹریلیا کے کپتان پیٹ کمنز نے ٹاس جیت کر بولنگ کا فیصلہ کیا۔آسٹریلیا کی دعوت پر پہلے بیٹنگ کرتے ہوئے پوری ہندوستانی ٹیم 50 اوورز میں 240 رنز بنا کر آؤٹ ہو گئی، کے ایل راہول 66 اور ویرات کوہلی 54 رنز بنا کر نمایاں رہے۔
یہ بھی پڑھیں
کرکٹ کی دنیا کا نیا بادشاہ بھارت یا آسٹریلیا؟ فیصلہ آج
آسٹریلیا نے ٹریوس ہیڈ اور لابوشین کی شاندار بلے بازی کی بدولت بھارت کو 43 اوورز میں 241 رنز کا ہدف دیا۔ ٹریوس ہیڈ نے 120 گیندوں پر 137 رنز کی شاندار اننگز کھیلی جبکہ لابوشین نے 58 رنز بنائے اور ناٹ آؤٹ رہے۔واضح رہے کہ آسٹریلیا نے چھٹی بار آئی سی سی ون ڈے ورلڈ کپ کا ٹائٹل اپنے نام کیا ہے، کینگروز 1987، 1999، 2003، 2007، 2015 اور اب 2023 میں ورلڈ کپ کی ٹرافی اٹھا چکے ہیں۔
احمد آباد کے نریندر مودی اسٹیڈیم میں 132,000 تماشائیوں کی گنجائش ہے۔ فائنل دیکھنے کے لیے بڑی تعداد میں بھارتی شائقین اسٹیڈیم میں موجود تھے جن میں کئی مشہور شخصیات بھی شامل تھیں۔
بھارت کی اننگز
بھارت نے آسٹریلیا کے خلاف جارحانہ آغاز کیا، اوپنر شبمن گل 4 رنز بنانے کے بعد آؤٹ ہوئے تاہم کپتان روہت شرما نے پورے ٹورنامنٹ کی طرح فائنل میں بھی دھواں دار بیٹنگ کرتے ہوئے ٹیم کو اچھا آغاز فراہم کیا تاہم پھر انہوں نے 31 گیندوں پر 47 رنز بنائے۔ 2 وکٹیں گرنے کے بعد آسٹریلوی گیند باز پورے میچ میں ہندوستانی بلے بازوں پر حاوی رہے اور انہیں کھل کر کھیلنے نہیں دیا۔ ویرات کوہلی اور کے ایل راہول نے سنگل ڈبلز کر کے طویل پارٹنرشپ بنانے کی کوشش کی لیکن پھر کوہلی بھی 54 رنز بنا کر آؤٹ ہو گئے جبکہ راہول بھی 66 رنز بنا کر پویلین لوٹ گئے۔
اس کے علاوہ سوریا کمار یادیو نے 18 رنز، رویندرا جدیجا نے 9 رنز، محمد شامی نے 6 رنز، شریاس ایئر نے 4 رنز بنائے۔ جسپریت بمرا نے ایک رن، کلدیپ یادیو نے 10 اور محمد سراج نے 9 رن بنائے۔
اس طرح بھارتی ٹیم مقررہ اوورز میں 240 رنز بنا کر آؤٹ ہو گئی۔آسٹریلیا کی جانب سے مچل اسٹارک نے 3، جوش ہیزل ووڈ اور پیٹ کمنز نے 2، 2 کھلاڑیوں کو آؤٹ کیا جب کہ ایڈم زمپا اور گلین میکسویل نے ایک ایک وکٹ حاصل کی۔
آسٹریلیا کی اننگز
بھارت کے ہدف کے تعاقب میں آسٹریلیا کی شروعات اچھی نہیں رہی، صرف 47 کے مجموعی سکور پر 3 آسٹریلوی بلے باز بھارتی باؤلرز کا شکار ہو گئے۔اوپنر ڈیوڈ وارنر 7، مچل مارش 15 اور سٹیو سمتھ 4 رنز بنا کر آؤٹ ہوئے۔3 وکٹیں گرنے کے بعد، لابوشین اور ٹریوس ہیڈ نے شاندار شراکت قائم کی اور احمد آباد کے گراؤنڈ میں بیٹھے 100,000 سے زیادہ ہندوستانی شائقین کو خاموش کردیا۔ دونوں بلے بازوں نے حوصلہ کے ساتھ بلے بازی کی اور گراؤنڈ کے چاروں طرف دلکش شاٹس بھی مارے۔لابوچن اور ٹریوس ہیڈ کے درمیان 192 رنز کی میچ جیتنے والی شراکت نے ہندوستان کے ورلڈ کپ جیتنے کے خواب چکنا چور کر دیئے۔
ٹریوس ہیڈ نے 137 جبکہ لابوچن نے 58 رنز کی ناقابل شکست اننگز کھیلی، گلین میکسویل 2 رنز بنا کر ناٹ آؤٹ رہے۔واضح رہے کہ فائنل سے قبل بھارت پورے ٹورنامنٹ میں ناقابل شکست رہا، گروپ مرحلے کے 9 میچز اور پھر سیمی فائنل میں بھارتی ٹیم نے نیوزی لینڈ کے خلاف کامیابی حاصل کی۔
انعامی رقم
رواں ورلڈ کپ کے لیے آئی سی سی نے کل ایک کروڑ ڈالر کی انعامی رقم کا اعلان کیا ہے۔جیتنے والی ٹیم کے لیے 40 لاکھ ڈالر کی انعامی رقم کا اعلان کیا گیا جب کہ ہارنے والی ٹیم کو 2 ملین ڈالر دیے جائیں گے۔
