اردو ورلڈ کینیڈا ( ویب نیوز )نائیجیریا کی ریاست انامبرا میں دہشت گردوں نے امریکی سفارت خانے کے عملے کے قافلے پر حملہ کردیا جس کے نتیجے میں 2 پولیس اہلکار اور 2 قونصلر اہلکار ہلاک جب کہ 2 پولیس اہلکار اور ڈرائیور کو اغوا کرلیا گیا۔
عالمی خبر رساں ادارے کے مطابق دہشت گردوں نے پولیس افسران اور قونصلر عملے کو قتل کرنے کے بعد ان کی لاشوں کو گاڑی سمیت جلا دیا اور تاحال مغویوں کا کوئی سراغ نہیں مل سکا۔
دوسری جانب امریکی قومی سلامتی کونسل کے ترجمان جان کربی کا کہنا تھا کہ ایسا لگتا ہے کہ ایک امریکی گاڑی کو نشانہ بنایا گیا تاہم میں اس بات کی تصدیق کرسکتا ہوں کہ حملے میں کوئی امریکی شہری ہلاک یا زخمی نہیں ہوا۔تاہم، امریکی محکمہ خارجہ نے بعد میں ایک بیان میں کہا کہ اس کا سفارتی عملہ نائجیریا کی سکیورٹی سروسز کے ساتھ مل کر واقعے کی تحقیقات کر رہا ہے۔
یہ بھی پڑھیں
قتل کی ایسی لرزہ خیز واردات جس نے امریکی ریاست پوٹاہ کوہلا کر رکھ دیا
عملے کی حفاظت ہمارے لیے ہمیشہ اہم ہوتی ہے۔دوسری جانب نائجیریا کی حکومت نے ہلاک اور مغوی اہلکاروں کی شناخت ظاہر نہیں کی ہے اور نہ ہی یہ بتایا گیا ہے کہ سفارتی قافلے میں کتنے افراد تھے اور یہ لوگ کہاں اور کس مقصد کے لیے جا رہے تھے۔
نائجیریا کے پولیس چیف نے افسوس کا اظہار کیا کہ قافلہ پولیس یا کسی سیکیورٹی ایجنسی کو بتائے بغیر اور گارڈز لیے بغیر خطرناک علاقے میں داخل ہوا۔ اگر وہ علاقے میں داخل ہونے سے پہلے اطلاع دیتے تو سیکورٹی فراہم کی جاتی۔
مزید پڑھیں
امریکی شہر نیو اورلینز ’مرڈر کیپیٹل‘ قرار
واضح رہے کہ جس علاقے میں امریکی سفارتی عملے کو نشانہ بنایا گیا وہ علیحدگی پسندوں کا گڑھ ہے اور گزشتہ روز ہی شمالی وسطی ریاست میں سکیورٹی فورسز کے چھاپوں میں 30 افراد ہلاک اور درجنوں مکانات تباہ ہو گئے تھے۔سیکیورٹی فورسز نے دعوی کیا کہ کارروائی میں شدت پسند مارے گئے جب کہ ان کے ٹھکانے بھی تباہ کردیئے گئے۔
