اردوورلڈ کینیڈا ( ویب نیوز )انٹر سروسز پبلک ریلیشنز (آئی ایس پی آر) کے مطابق ضلع چترال کے علاقے کیلاش میں دہشت گردوں نے دو چوکیوں پر حملہ کیا جس کے نتیجے میں 4 جوان شہید جب کہ جوابی کارروائی میں 12 دہشت گرد مارے گئے۔ .
آئی ایس پی آر کے مطابق ضلع چترال کے علاقے کالاش میں دہشت گردوں کے ایک بڑے گروپ نے 2 چوکیوں پر حملہ کیا۔
پاک فوج کے شعبہ تعلقات عامہ کے مطابق جوابی کارروائی میں 12 دہشت گرد جہنم واصل ہوئے اور بڑی تعداد میں دہشت گرد زخمی بھی ہوئے۔

آئی ایس پی آر کا کہنا ہے کہ فائرنگ کے تبادلے میں 4 جوانوں نے ملک کے لیے قربانی دی، علاقے میں دہشت گردوں کے خاتمے کا سرچ آپریشن جاری ہے۔
پاک فوج کے شعبہ تعلقات عامہ کے مطابق افغانستان کے صوبوں کنڑ اور نورستان کے علاقوں گواردیش، پتگل، بارگ متل اور بتش میں دہشت گردوں کی نقل و حرکت دیکھی گئی۔ افغانستان کی عبوری حکومت کو دہشت گردوں کی نقل و حرکت سے آگاہ کیا گیا۔ .
آئی ایس پی آر کا کہنا ہے کہ امید ہے کہ افغان عبوری حکومت اپنی ذمہ داریاں پوری کرے گی، افغان حکومت دہشت گردوں کو اپنی سرزمین پاکستان کے خلاف استعمال کرنے سے روکے گی۔
پاک فوج کے شعبہ تعلقات عامہ کے مطابق مسلح افواج دہشت گردی کے خاتمے کے لیے پرعزم ہیں، ہمارے جوانوں کی قربانیاں دہشت گردی کے خلاف ہمارے عزم کو مضبوط کرتی ہیں۔