143
اردو ورلڈ کینیڈا ( ویب نیوز ) حکومت کی کفایت شعاری پالیسی کے تحت وزیر خزانہ اسحاق ڈار نے وفاقی وزارتوں اور ڈویژنوں کے بجٹ میں فوری طور پر 15 فیصد کٹوتی کی ہدایت کردی۔کفایت شعاری کے اقدامات پر عملدرآمد سے متعلق مانیٹرنگ کمیٹی کا اجلاس وزیر خزانہ اسحاق ڈار کی زیر صدارت ہوا۔
اجلاس میں کابینہ ارکان اور سرکاری افسران سے لگژری گاڑیاں واپس لینے کا بھی فیصلہ کیا گیا۔اجلاس میں فیصلہ کیا گیا کہ وقت اور لاگت کی بچت کے لیے تمام میٹنگز ٹیلی کانفرنسنگ کے ذریعے منعقد کرنے کی حوصلہ افزائی کی جائے گی۔ کفایت شعاری کے حوالے سے کابینہ کے فیصلوں پر عملدرآمد کے حوالے سے بریفنگ کے دوران سیکرٹری خزانہ نے کہا کہ فیصلوں پر عملدرآمد میں کسی قسم کی رعایت اور خلاف ورزی کی اجازت نہیں دی جائے گی۔ملک کی موجودہ مشکل معاشی صورتحال پر روشنی ڈالتے ہوئے اسحاق ڈار نے تمام متعلقہ اداروں پر زور دیا کہ وہ اپنی صفوں میں بغیر کسی رعایت کے اخلاص اور لگن کے ساتھ کفایت شعاری کے اقدامات پر عمل درآمد کو یقینی بنائیں۔ 200 ارب روپے کی بچت کا امکان ہے۔
