اردو ورلڈ کینیڈا ( ویب نیوز ) اسرائیلی میڈیا نے دعویٰ کیا ہے کہ ایران کے نئے سپریم لیڈر کے طور پر آیت اللہ علی خامنہ ای کے بیٹے مجتبیٰ خامنہ ای کے نام کی منظوری دے دی گئی ہے۔
رپورٹس کے مطابق سپریم لیڈر کے انتخاب کے لیے قائم کی گئی کمیٹی نے مجتبیٰ خامنہ ای کی حمایت کر دی ہے اور ان کی باضابطہ نامزدگی کا اعلان آئندہ چند گھنٹوں میں متوقع ہے۔دوسری جانب ایرانی میڈیا نے اس خبر کی مکمل تصدیق نہیں کی۔ سرکاری ذرائع کے مطابق نئے سپریم لیڈر کے انتخاب کے لیے اہم اجلاس جاری ہے جبکہ پاسدارانِ انقلاب کا کہنا ہے کہ حتمی فیصلے میں تقریباً ایک ہفتہ لگ سکتا ہے۔ ایرانی سرکاری میڈیا کے مطابق نئے سپریم لیڈر کا باضابطہ اعلان آیت اللہ علی خامنہ ای کی تدفین کے بعد کیا جائے گا۔
مجتبیٰ خامنہ ای ایران کے معروف مذہبی و سیاسی خاندان سے تعلق رکھتے ہیں۔ وہ آیت اللہ علی خامنہ ای کے دوسرے صاحبزادے ہیں اور عرصہ دراز سے ایرانی سیاسی حلقوں میں ایک بااثر شخصیت سمجھے جاتے رہے ہیں۔ انہیں اپنے والد کے ممکنہ جانشین کے طور پر بھی دیکھا جاتا رہا ہے۔
سن 1969 میں مشہد میں پیدا ہونے والے مجتبیٰ خامنہ ای نے اپنے بچپن کے ابتدائی سات سال ایران کے شمال مغربی شہروں سردشت اور مہاباد میں گزارے۔ انہوں نے ایران۔عراق جنگ میں حصہ لیا اور بعد ازاں مذہبی تعلیم حاصل کر کے عالمِ دین کے طور پر شناخت بنائی۔ سن 2009 کے صدارتی انتخابات کے بعد ہونے والے احتجاجی مظاہروں کے دوران سکیورٹی فورسز پر اثر و رسوخ رکھنے کے حوالے سے بھی ان کا نام سامنے آتا رہا۔
مجتبیٰ خامنہ ای نے 2004 میں زہرہ حداد عادل سے شادی کی۔ سیاسی طور پر انہیں سابق ایرانی صدر محمود احمدی نژاد کے قریب سمجھا جاتا ہے۔ سن 2019 میں امریکا نے ان پر پابندیاں بھی عائد کی تھیں۔تجزیہ کاروں کے مطابق اگر مجتبیٰ خامنہ ای کو باضابطہ طور پر ایران کا سپریم لیڈر نامزد کیا جاتا ہے تو یہ ایرانی سیاست میں ایک اہم اور تاریخی پیش رفت ہوگی، جس کے داخلی اور عالمی سطح پر گہرے اثرات مرتب ہو سکتے ہیں۔ تاہم حتمی اعلان تک صورتحال غیر یقینی رہے گی اور عالمی برادری کی نظریں تہران پر مرکوز ہیں۔
