اردو ورلڈ کینیڈا ( ویب نیوز )عائشہ عمر نے شعیب ملک کے ساتھ اپنے تعلقات کی خبروں پر ردعمل کا اظہار کرتے ہوئے کہا ہے کہ وہ شادی شدہ مرد کے ساتھ تعلقات کا سوچ بھی نہیں سکتیں۔
حال ہی میں قومی کرکٹر شعیب ملک اور ثانیہ مرزا کی علیحدگی کی افواہیں پھیلنے کے بعد بھارتی میڈیا نے دھوم مچا دی تھی کہ پاکستانی اداکارہ عائشہ عمر اور شعیب ملک کے گہرے تعلقات کی وجہ سے یہ جوڑی الگ ہو رہی ہے۔
بھارتی ٹینس اسٹار ثانیہ مرزا اور شعیب ملک کے نئے اردو فلکس شو ‘دی مرزا ملک شو’ کے آن ایئر ہونے کے بعد یہ ثابت ہوگیا کہ خوبصورت جوڑا اب بھی ساتھ اور خوش ہے، جس کے بعد تمام افواہیں دم توڑ گئیں۔
ایک حالیہ انٹرویو میں جب اداکارہ عائشہ عمر سے شعیب ملک کے ساتھ تعلقات کے بارے میں سوال کیا گیا تو انہوں نے واضح کیا کہ ان کے درمیان کوئی ایسا رشتہ نہیں ہے۔
اداکارہ نے کہا کہ شعیب ملک کے ساتھ میرا فوٹو شوٹ ایک سال پرانا تھا لیکن چند میڈیا ہا ئوسز نے ایک سال بعد اسے ایسے ہائی لائٹ کیا جیسے یہ حالیہ فوٹو شوٹ ہو جس کے بعد یہ دوبارہ سوشل میڈیا پر گردش کرنے لگا۔
عائشہ عمر کا کہنا تھا کہ یہ ایک پروفیشنل فوٹو شوٹ تھا اور اگر وہ کسی مرد کے ساتھ تعلقات میں تھیں تو وہ باقاعدہ فوٹو شوٹ کیوں کراتیں ؟
عائشہ کا کہنا تھا کہ وہ شادی شدہ لوگوں کے معاملات سے دور رہنا چاہتی ہیں اور کسی شادی شدہ شخص کے ساتھ تعلقات کا سوچ بھی نہیں سکتیں۔
یاد رہے کہ عائشہ عمر اور شعیب ملک کا بولڈ فوٹو شوٹ وائرل ہونے کے بعد سوشل میڈیا پر مداحوں اور صارفین کی جانب سے انہیں تنقید کا نشانہ بنایا گیا تھا۔
