اردو ورلڈ کینیڈا ( ویب نیوز ) قومی کرکٹ ٹیم کے کپتان بابر اعظم اور وکٹ کیپر بلے باز محمد رضوان امریکا کی ہارورڈ یونیورسٹی کے پروگرام کے لیے امریکا روانہ ہوگئے۔
بابر اعظم اور محمد رضوان ہارورڈ یونیورسٹی بزنس سکول کے تعلیمی پروگرام میں شرکت کریں گے۔
دونوں قومی کرکٹرز ہارورڈ یونیورسٹی ایجوکیشن پروگرام میں شرکت کرنے والے پہلے پروفیشنل کرکٹرز ہوں گے، بابر اور رضوان 31 مئی سے 3 جون تک ہارورڈ یونیورسٹی ایجوکیشن پروگرام میں شرکت کریں گے۔ہارورڈ یونیورسٹی کا تعلیمی پروگرام بوسٹن کے ہارورڈ بزنس اسکول میں منعقد ہوگا۔
اس حوالے سے کیپٹن بابر اعظم کا کہنا تھا کہ میں ساری زندگی سیکھتا رہا ہوں، میں نے اس پروگرام کے حوالے سے پروفیسر البورس اور طلحہ رحمانی سے بھی تفصیلی بات چیت کی ہے، میں اس عالمی معیار کے پروگرام میں نئی چیزیں سیکھنے اور تجربہ کرنے کے لیے بے تاب ہوں۔ قومی کرکٹر نے کہا کہ مجھے یقین ہے کہ مجھے دنیا کے کونے کونے سے آنے والے مختلف شعبوں سے تعلق رکھنے والے لوگوں سے بہت کچھ سیکھنے کو ملے گا۔
محمد رضوان نے کہا کہ اتنے باوقار عالمی اسٹیج پر پاکستان کی نمائندگی کرنا بڑے اعزاز کی بات ہے، ہم دنیا کے بہترین لوگوں سے سیکھنے کے لیے ہارورڈ کے بی ای ایم ایس پروگرام میں جا رہے ہیں۔رضوان نے کہا کہ مجھے یقین ہے کہ یہ ایک دلچسپ سفر ہوگا، میں کرکٹ کی دنیا کے اگلے سپر اسٹارز کے ساتھ اپنے تجربات شیئر کرنے کا منتظر ہوں۔
