اردوورلڈکینیڈا( ویب نیوز)ملک میں بجلی صارفین کے لیے ممکنہ طور پر ایک مہینے کے لیے قیمتوں میں اضافہ کی خبریں سامنے آ گئی ہیں۔ اطلاعات کے مطابق سینٹرل پاور پرچیزنگ ایجنسی (سی پی پی اے) نے ماہانہ فیول پرائس ایڈجسٹمنٹ کے تحت نیشنل الیکٹرک پاور ریگولیٹری اتھارٹی (نیپرا) میں درخواست جمع کرائی ہے، جس کی سماعت 29 جنوری کو متوقع ہے۔

سی پی پی اے کی جانب سے دائر درخواست میں بتایا گیا ہے کہ دسمبر کے مہینے میں ملک بھر میں 8 ارب 48 کروڑ 70 لاکھ یونٹس بجلی پیدا کی گئی، جبکہ اسی دوران ڈسٹری بیوشن کمپنیوں کو 8 ارب 20 کروڑ 80 لاکھ یونٹس بجلی فراہم کی گئی۔ اس عرصے میں بجلی کی فی یونٹ پیداوار کی لاگت 9.62 روپے رہی۔

درخواست میں کہا گیا ہے کہ اس مہینے کے دوران پیداوار اور لاگت کے فرق کی بنیاد پر صارفین پر 48 پیسے فی یونٹ اضافی چارج لگانے کی تجویز دی گئی ہے تاکہ بجلی کی پیداوار اور تقسیم میں پیدا ہونے والے اخراجات پورے کیے جا سکیں۔

نیپرا کی جانب سے درخواست پر فیصلہ آنے کے بعد ہی یہ واضح ہو سکے گا کہ صارفین کو فی یونٹ کتنے اضافی پیسے ادا کرنے ہوں گے اور اس اضافہ کا اطلاق کب سے ہوگا۔