اردو ورلڈ کینڈا ( ویب نیوز ) بنگلہ دیشی فوج میں بڑے پیمانے پر اکھاڑ پیچھاڑ ،بنگلہ دیش کے انٹر سروسز پبلک ریلیشنز (آئی ایس پی آر)کی جانب سے جاری بیان میں کہا گیا ہے کہ میجر جنرل ضیا الاحسن کو ملازمت سے برطرف کر دیا گیا ہے۔ میجر جنرل ضیا الحسن مالکی وزارت داخلہ کے ماتحت ایک انٹیلی جنس ایجنسی نیشنل ٹیلی کمیونیکیشن مانیٹرنگ سینٹر (NTMC) کے ڈائریکٹر جنرل تھے۔ایجنسی ملک کی صورتحال پر نظر رکھنے، ڈیٹا اکٹھا کرنے اور مواصلاتی مواد کو ریکارڈ کرنے کی ذمہ دار تھی۔اس کے علاوہ ایجنسی کو ای میلز اور سوشل میڈیا اکانٹس کی نگرانی اور فون کالز ریکارڈ کرنے کی بھی اجازت ہے۔بنگلہ دیشی آئی ایس پی آر کے مطابق لیفٹیننٹ جنرل سیف عالم کو وزارت خارجہ کا قلمدان سونپا گیا ہے، اس کے علاوہ لیفٹیننٹ جنرل مجیب الرحمان جی او سی آرمی ٹریننگ اور ڈاکٹرائن کمانڈ ہوں گے۔ بنگلہ دیش کی فوج کے شعبہ تعلقات عامہ نے کہا کہ میجر جنرل ضیا الاحسن کی جگہ میجر جنرل رضوان الرحمان کو ڈی جی این ٹی ایم سی تعینات کیا جائے گا۔واضح رہے کہ حسینہ واجد گزشتہ روز طلبا کے احتجاج پر اقتدار چھوڑ کر فوجی ہیلی کاپٹر میں بھارت فرار ہوگئی تھیں جس کے بعد آرمی چیف نے عبوری حکومت کے قیام کا اعلان کیا تھا۔
115
