اردو ورلڈ کینیڈا ( ویب نیوز ) بنگلہ دیش میں اپوزیشن جماعتیں ایک بار پھر وزیراعظم حسینہ واجد کے استعفے کا مطالبہ کرتے ہوئے سڑکوں پر آگئیں۔

دارالحکومت ڈھاکہ میں حکومت کے خلاف اپوزیشن کے مظاہرین کا احتجاج دوسرے روز بھی جاری رہا، ہزاروں افراد نے شہر کے اہم مقامات پر دھرنا دیا اور سڑکیں بلاک کر دیں۔

احتجاج کے باعث ڈھاکہ کا دیگر شہروں سے زمینی رابطہ بری طرح متاثر ہوا، مرکزی شاہراہوں پر شدید ٹریفک جام رہا۔کئی مقامات پر پولیس اور مظاہرین کے درمیان جھڑپیں ہوئیں، مظاہرین نے پولیس پر پتھراؤ کیا، پولیس نے ربڑ کی گولیوں اور آنسو گیس کے شیل پھینک کر مظاہرین کو منتشر کیا۔جھڑپوں میں 6 مظاہرین اور 20 پولیس اہلکار زخمی ہوئے جب کہ پولیس نے 90 مظاہرین کو گرفتار کر لیا۔

بنگلہ دیش میں اپوزیشن جماعت بنگلہ دیش نیشنل پارٹی کی کال پر احتجاج جاری ہے جس میں جماعت اسلامی سمیت دیگر جماعتیں بھی حصہ لے رہی ہیں۔بنگلہ دیش میں اپوزیشن جماعتیں گزشتہ سال سے حکومت کے خلاف احتجاج کر رہی ہیں، بنگلہ دیشی اپوزیشن جماعتیں وزیراعظم حسینہ واجد کے استعفے اور نگراں حکومت کا مطالبہ کر رہی ہیں۔