اردوورلڈکینیڈا( ویب نیوز)چیئرمین پاکستان تحریک انصاف بیرسٹر گوہر علی خان نے بانی چیئرمین عمران خان کے طبی معائنے اور علاج سے متعلق حالیہ پیش رفت پر ردعمل دیتے ہوئے کہا ہے کہ انہیں پیشگی طور پر کسی قسم کی باضابطہ اطلاع فراہم نہیں کی گئی۔
اپنے بیان میں بیرسٹر گوہر علی خان کا کہنا تھا کہ آج علی الصبح تقریباً دو بجے انہیں ایک پیغام کے ذریعے آگاہ کیا گیا کہ عمران خان کو انجیکشن لگانے کے لیے پاکستان انسٹی ٹیوٹ آف میڈیکل سائنسز منتقل کیا گیا ہے۔ انہوں نے کہا کہ انہیں اس حوالے سے نہ تو پہلے اعتماد میں لیا گیا اور نہ ہی باقاعدہ طور پر اطلاع دی گئی، جس پر انہیں تشویش ہے۔
چیئرمین پی ٹی آئی نے واضح کیا کہ پارٹی کا مؤقف آج بھی وہی ہے جو پہلے دن سے رہا ہے۔ ان کے مطابق عمران خان کا مکمل طبی معائنہ اور علاج اسلام آباد کے معروف نجی طبی ادارے شفا انٹرنیشنل ہسپتال میں کرایا جائے، جہاں ان کے ذاتی معالجین اور اہل خانہ کی موجودگی میں جامع چیک اپ ممکن ہو سکے۔ انہوں نے زور دیا کہ ایک سابق وزیراعظم اور زیرحراست سیاسی رہنما کے طور پر عمران خان کو معیاری اور شفاف طبی سہولیات کی فراہمی یقینی بنائی جانی چاہیے۔
بیرسٹر گوہر علی خان کا کہنا تھا کہ عمران خان کی صحت کے حوالے سے پارٹی قیادت اور اہل خانہ کو مکمل آگاہی دی جانی چاہیے تاکہ کسی قسم کی ابہام یا خدشات پیدا نہ ہوں۔ انہوں نے مطالبہ کیا کہ آئندہ کسی بھی طبی پیش رفت سے قبل پارٹی اور خاندان کو اعتماد میں لیا جائے اور تمام مراحل شفاف انداز میں مکمل کیے جائیں۔
انہوں نے اس عزم کا اعادہ کیا کہ پی ٹی آئی اپنے قائد کی صحت اور قانونی حقوق کے تحفظ کے لیے ہر ممکن آئینی و قانونی راستہ اختیار کرے گی۔
