اردو ورلڈ کینیڈا ( ویب نیوز )وفاقی وزیر داخلہ رانا ثناء اللہ نے کہا ہے کہ شکایات سے پہلے اختلافات دور ہو گئےتھے بلاول بھٹو کے اعتراضات کووزیر اعظم نے تسلیم کرتے ہوئے جو مسائل تھے حل کردئیے
رانا ثناء اللہ نے کہا کہ انسانی سمگلنگ کے حوالے سے تحقیقات جاری ہیں، ان سمگلروں کو سخت ترین قوانین کے تحت کارروائی کرکے سزا دی جائے گی جب کہ ان انسانی سمگلروں کے حوالے سے بین الاقوامی تعاون بھی چاہتے ہیں۔
انہوں نے کہا کہ انسانی سمگلنگ کی تحقیقات کے لیے ایک کمیٹی بھی تشکیل دی گئی ہے جو ایک ہفتے میں اپنا کام مکمل کرکے رپورٹ پیش کرے گی۔
وزیر داخلہ نے کہا کہ انسانی حقوق کی تنظیمیں چھوٹی چھوٹی باتوں پر خط لکھتی ہیں، انہیں نظر نہیں آتا، جو لوگ کشتی حادثے میں بچ گئے وہ سب کچھ بتا رہے ہیں،کوسٹ گارڈ کے رویے پر یونانی حکومت سے بات کریں گے۔ .
بلاول بھٹو کے حوالے سے بات کرتے ہوئے رانا ثناء اللہ نے کہا کہ شکایات درج ہونے یا بلاول بھٹو کی تقریر سے پہلے اختلافات دور ہو گئے۔ مخلوط حکومت کی باقی ماندہ مدت بھی اسی سمجھ بوجھ سے گزرے گی۔
یاد رہے کہ سوات میں جلسے سے خطاب کرتے ہوئے پاکستان پیپلز پارٹی کے چیئرمین اور وزیر خارجہ بلاول بھٹو زرداری نے وزیراعظم کو خبردار کیا کہ سیلاب متاثرین کی بحالی کے لیے رقم نہ ملنے پر پیپلز پارٹی بجٹ منظور نہیں ہونے دے گی۔
بلاول بھٹو زرداری نے سوات کے علاقے خوازہ خیلہ میں جلسے سے خطاب میں پاکستان تحریک انصاف کے چیئرمین عمران خان اور حکومت کی معاشی ٹیم کو تنقید کا نشانہ بنایا تھا
