اردو ورلڈ کینیڈا ( ویب نیوز)بھارتی ریاست کیرالہ کے دارالحکومت تھرواننت پورم کی ایک معروف شاہراہ کو پاکستان کی سابق وزیر اعظم بے نظیر بھٹو کی تصاویر سے سجا دیا گیا ہے اور اس جگہ کو بے نظیر اسکوائر کا نام دیا گیا ہے۔
بھارتی میڈیا کے مطابق ریاست کیرالہ میں کمیونسٹ پارٹی کے خواتین ونگ ’’آل انڈیا ڈیموکریٹک ویمنز ایسوسی ایشن‘‘ کے زیراہتمام قومی کانفرنس کا انعقاد کیا جارہا ہے اور اس حوالے سے تمام اہم شاہراہوں اور مقامات پر بینرز آویزاں کردیئے گئے ہیں۔
ان بینرز میں شہید بینظیر بھٹو کی تصویر بھی آویزاں ہے۔ جس پر لکھا ہے کہ بے نظیر بھٹو پاکستان کی پہلی خاتون وزیراعظم تھیں جنہیں ہارورڈ سمیت دنیا کی 9 بہترین یونیورسٹیوں سے ڈاکٹریٹ کی ڈگریاں دی گئیں۔
بینرز پر پاکستان کی پہلی خاتون وزیراعظم کی تصویر کے ساتھ بے نظیر اسکوائر کے الفاظ بھی لکھے گئے ہیں۔ عوام کی اکثریت نے کمیونسٹ پارٹی کے اس اقدام کو سراہا ہے۔
تاہم مودی کی پارٹی بی جے پی کے کارکنوں نے شہر بھر میں ہنگامہ برپا کر دیا۔ بی جے پی لیڈر سندیپ واشاپتی نے کہا کہ دشمن ملک کے سابق وزیر اعظم کی تصویریں پوسٹ کرنا ملک کے ساتھ غداری ہے۔
