اردوورلڈ کینیڈا( ویب نیوز)سپریم کورٹ نے بانی چیئرمین تحریک انصاف عمران خان کے خلاف 9 مئی کے مقدمات میں دائر ضمانت کی اپیلوں کی سماعت کے لیے تشکیل دیے گئے بینچ میں تبدیلی کر دی ہے۔
چیف جسٹس یحییٰ آفریدی کی سربراہی میں قائم تین رکنی بینچ میں جسٹس میاں گل حسن اورنگزیب کی جگہ جسٹس حسن اظہر رضوی کو شامل کر لیا گیا، جس کے بعد نیا بینچ سماعت کر رہا ہے۔ آج کی سماعت میں استغاثہ کے وکیل ذوالفقار نقوی اپنے دلائل پیش کر رہے ہیں۔
گزشتہ روز پراسیکیوٹر ذوالفقار نقوی کی طبیعت ناساز ہونے کے باعث کارروائی مؤخر کی گئی تھی، اور عدالت نے ہدایت دی تھی کہ کیس کی دوبارہ سماعت آج کی جائے گی۔
سماعت کے آغاز پر چیف جسٹس نے پراسیکیوٹر سے دو نکات پر وضاحت طلب کی: پہلا یہ کہ کیا ضمانت کی درخواست پر فیصلہ دیتے ہوئے عدالت کوئی حتمی رائے دے سکتی ہے؟ دوسرا یہ کہ جب سازش کے الزام میں ملزمان کو ضمانت مل چکی ہے تو کیا وہی اصول یہاں بھی لاگو نہیں ہوگا؟
پراسیکیوٹر نے مؤقف اپنایا کہ ضمانت سے متعلق عدالتی مشاہدات ہمیشہ عارضی نوعیت کے ہوتے ہیں اور ان کا ٹرائل پر براہِ راست اثر نہیں پڑتا۔ ان کے مطابق 1996 سے 2024 تک سپریم کورٹ متعدد فیصلوں میں یہ واضح کر چکی ہے۔
چیف جسٹس نے ریمارکس میں کہا کہ عدالت کیس کے بنیادی حقائق پر بحث کی اجازت نہیں دے گی، کیونکہ یہ ٹرائل کورٹ کا اختیار ہے۔ دورانِ سماعت سائفر کیس اور اعجاز چوہدری کی ضمانت کے فیصلوں کا حوالہ بھی دیا گیا۔
چیف جسٹس نے مزید کہا کہ 9 مئی کے ایک مقدمے میں سازش کا الزام ہونے کے باوجود ضمانت دی گئی تھی، اس فیصلے کی وضاحت عدالت کے سامنے پیش کی جائے۔ اس پر اسپیشل پراسیکیوٹر نے کہا کہ اس نوعیت کے کیس میں سپریم کورٹ نے تین ملزمان کو ضمانت دی تھی، جبکہ بعض ملزمان ایف آئی آر میں نامزد بھی نہیں تھے۔
بعد ازاں عدالت نے کارروائی ساڑھے گیارہ بجے تک ملتوی کر دی۔
