اردو ورلڈ کینیڈا ( ویب نیوز ) بی جے پی نے امریکی محکمہ خارجہ اور "گہری ریاست” کے عناصر پر صحافیوں اور اپوزیشن لیڈر راہول گاندھی کے ایک گروپ کے ساتھ مل کر ہندوستان کو غیر مستحکم کرنے کی کوشش کرنے کا الزام لگایا ہے۔
رپورٹ کے مطابق یہ الزام حیران کن ہے کیونکہ نئی دہلی اور واشنگٹن نے گزشتہ دو دہائیوں میں مضبوط تعلقات استوار کیے ہیں اور دونوں ممالک نے کچھ اختلافات کے باوجود مزید تعلقات استوار کرنے کا عزم ظاہر کیا ہے۔بین الاقوامی میڈیا کے مطابق، حکمراں جماعت نے جمعرات کو کہا کہ گاندھی کی کانگریس پارٹی نے آرگنائزڈ کرائم اینڈ کرپشن رپورٹنگ پروجیکٹ (او سی سی آر پی) کے ایسے مضامین استعمال کیے جو مودی کو کمزور کرنے کے لیے مکمل طور پر اڈانی گروپ اور حکومت سے اس کی مبینہ قربت پر مرکوز ہیں۔
غیر ملکی میڈیا رپورٹس کے مطابق گزشتہ ماہ اڈانی گروپ کے سربراہ گوتم اڈانی اور دیگر سات افراد پر امریکہ میں بھارتی حکام کو رشوت دینے کی 265 ملین ڈالر کی اسکیم میں ملوث ہونے پر فرد جرم عائد کی گئی تھی جب کہ گروپ نے ان الزامات کو بے بنیاد قرار دیا ہے۔خبر رساں ادارے روئٹرز کے مطابق آرگنائزڈ کرائم اینڈ کرپشن رپورٹنگ پروجیکٹ کے مضامین میں یہ بھی الزام لگایا گیا ہے کہ ہندوستان میں ریاستی سرپرستی میں چلنے والے ہیکرز حکومتی ناقدین کو نشانہ بنانے کے لیے اسرائیلی ساختہ پیگاسس اسپائی ویئر کا استعمال کرتے ہیں، جب کہ حکومت اس سے قبل دونوں الزامات کی تردید کر چکی ہے۔
غیر ملکی میڈیا کے مطابق، بی جے پی اس سے قبل گاندھی، او سی سی آر پی اور 92 سالہ ارب پتی جارج سوروس پر مودی پر حملہ کرنے کا الزام لگا چکی ہے، ایک فرانسیسی میڈیا رپورٹ کا حوالہ دیتے ہوئے جس میں کہا گیا تھا کہ او سی سی آر پی کو امریکی ایجنسی برائے بین الاقوامی ترقی اور دیگر اہم ریاستی شخصیات نے مالی اعانت فراہم کی تھی۔بی جے پی نے سوشل میڈیا پلیٹ فارم ایکس پر پیغامات کی ایک سیریز میں کہا ہے کہ دیپ اسٹیٹ کا واضح مقصد وزیر اعظم مودی کو نشانہ بنا کر ہندوستان کو غیر مستحکم کرنا تھا اور اس مقصد کے پیچھے امریکی محکمہ خارجہ ہمیشہ سے رہا ہے۔
