اردوورلڈکینیڈا( ویب نیوز)وفاقی وزیرِ خزانہ محمد اورنگزیب نے کہا ہے کہ بلیو اکانومی (سمندری معیشت) پاکستان کی اقتصادی ترقی میں ایک اہم سنگِ میل ثابت ہو سکتی ہے۔
پاکستان انٹرنیشنل میری ٹائم ایکسپو اینڈ کانفرنس 2025 سے ورچوئل خطاب میں انہوں نے کہا کہ ملکی معیشت درست سمت میں بڑھ رہی ہے اور حکومت بنیادی اقتصادی اصلاحات پر سنجیدگی سے عمل کر رہی ہے تاکہ پائیدار ترقی کو یقینی بنایا جا سکے۔
ان کا کہنا تھا کہ گزشتہ ڈھائی برسوں میں معاشی استحکام کے لیے ٹھوس اقدامات کیے گئے جن کے نتیجے میں افراطِ زر اور پالیسی ریٹ میں نمایاں کمی آئی۔ انہوں نے بتایا کہ تین بین الاقوامی ریٹنگ ایجنسیوں نے بھی پاکستان کے معاشی اقدامات کو سراہا ہے۔
وزیر خزانہ نے مزید کہا کہ تجارت اور معیشت کے استحکام کے لیے دوست ممالک کا تعاون حاصل ہے، جب کہ کراچی، گوادر اور پورٹ قاسم کی بندرگاہوں کو جدید خطوط پر استوار کیا جا رہا ہے۔ ان کے مطابق وزارتوں کے درمیان بہتر ہم آہنگی کے ذریعے بلیو اکانومی سے بھرپور استفادہ حاصل کیا جائے گا، اور وزارتِ خزانہ ملکی معیشت کے استحکام کے لیے ہر ممکن تعاون جاری رکھے گی۔
