بین الاقوامی خبر رساں ادارے کے مطابق مونٹریال پولیس نے یہودی کمیونٹی سینٹر پر بوتل بم سے حملے کی اطلاع ملنے پر فائر بریگیڈ کو طلب کرلیا۔ عمارت سے 50 سے زائد افراد کو محفوظ مقام پر منتقل کر دیا گیا۔
حملے کے وقت عمارت میں 60 افراد موجود تھے اور کمیونٹی سینٹر کی سیکیورٹی کے حوالے سے اجلاس جاری تھا۔ حملے میں کوئی زخمی نہیں ہوا تاہم عمارت کو نقصان پہنچا۔
پولیس کا کہنا ہے کہ جس کمرے میں بوتل بم گرا وہاں کے قالین، پردے اور دروازے میں آگ لگ گئی اور فرنیچر مکمل طور پر جل کر راکھ ہوگیا۔ مرکز میں آگ بجھانے والے آلات نے آگ کو دوسرے کمروں تک پھیلنے سے روک دیا۔
کینیڈا کے وزیراعظم نے واقعے کی شدید مذمت کی ہے جب کہ پولیس نے تحقیقات کا آغاز کردیا ہے تاہم ابھی تک کوئی گرفتاری عمل میں نہیں آئی۔
واضح رہے کہ رواں ماہ کینیڈا میں یہودیوں پر یہ تیسرا حملہ ہے اس سے قبل یہودیوں کے دو اسکولوں پر فائرنگ کی گئی اور ایک عبادت گاہ پر دستی بم سے حملہ کیا گیا اور یہ سب اسرائیل کی حماس پر وحشیانہ بمباری کے بعد ہوا۔
107
