اردو ورلڈ کینیڈا ( ویب نیو ز ) برطانیہ نے اسرائیل کی جانب سے ایران کی طرف سے لندن کو میزائل سے نشانہ بنانے کے دعوے کو مسترد کر دیا ہے۔
اسرائیل نے حال ہی میں دعویٰ کیا تھا کہ ایران برطانیہ کے دارالحکومت پر حملہ کرنے کا ارادہ رکھتا ہے، لیکن برطانوی حکام نے اس دعوے کو بنیاد ہی سے خالی قرار دیا ہے۔برطانیہ کے ہاؤسنگ سیکرٹری اسٹیو ریڈ نے اس معاملے پر بیان دیتے ہوئے کہا کہ اسرائیلی دعوے کی کوئی تصدیق شدہ معلومات موجود نہیں ہیں۔ انہوں نے مزید وضاحت کی کہ نہ تو کوئی ایسا اندازہ ہے کہ ایران واقعی برطانیہ کو نشانہ بنا رہا ہے اور نہ ہی یہ کہنا ممکن ہے کہ اگر چاہے تو وہ ایسا کر سکتا ہے۔
برطانیہ کی جانب سے اس دعوے کی تردید ایسے وقت میں سامنے آئی ہے جب خطے میں تناؤ بڑھ رہا ہے اور ایران کے خلاف عالمی سطح پر مختلف پابندیاں اور اسرائیل کی تنقیدی پالیسیاں جاری ہیں۔ سیکرٹری اسٹیو ریڈ کے مطابق برطانوی حکومت کی ترجیح عوام کی حفاظت اور موجودہ سکیورٹی صورتحال کی درست معلومات پر مبنی اقدامات کرنا ہے، نہ کہ کسی غیر مصدقہ دعوے پر مبنی افواہوں پر ردعمل دینا۔اسرائیل کی طرف سے یہ دعویٰ ایسے وقت سامنے آیا ہے جب خلیجی خطے اور یورپ میں ایران کے ممکنہ ہتھیاروں کے استعمال پر بین الاقوامی تشویش پائی جا رہی ہے۔ تاہم، برطانیہ کی واضح تردید سے یہ پیغام گیا ہے کہ لندن پر کسی حملے کے خطرے کے حوالے سے عوامی سطح پر غیر ضروری خوف پھیلانے کی ضرورت نہیں ہے۔
