اردوورلڈ کینیڈا( ویب نیوز)کیلگری کی بلدیاتی انتخابات کے لیے ایڈوانس ووٹنگ کے آخری روز ہفتہ کو 2025 میں اب تک کا سب سے زیادہ ووٹر ٹرن آؤٹ دیکھا گیا، تاہم مجموعی طور پر ووٹرز کی تعداد 2021 کے مقابلے میں اب بھی کم ہے۔
الیکشنز کیلگری کی جانب سے ہفتے کو جاری کیے گئے غیر سرکاری اعداد و شمار کے مطابق 2025 میں ایڈوانس ووٹنگ کے چھٹے دن 22 ہزار 144 ووٹ ڈالے گئے، جو 2021 کے اسی دن کے 19 ہزار 43 ووٹوں سے زیادہ ہیں۔ پانچویں دن جو 2021 میں دوسرا سب سے زیادہ ٹرن آؤٹ والا دن تھا، جب 23 ہزار 80 ووٹرز نے ووٹ دیا، اس سال 17 ہزار 704 ووٹ ڈالے گئے۔چھ دنوں کی ایڈوانس ووٹنگ مجموعی طور پر شہر کے ووٹر ٹرن آؤٹ کا 10.7 فیصد بنتی ہے۔
2025 کے یہ اعداد و شمار 2017 کے مقابلے میں زیادہ ہیں۔ اس سال 96 ہزار 549 ووٹرز نے چھ دنوں میں ووٹ ڈالے، جب کہ 2017 میں یہ تعداد 59 ہزار کے قریب تھی۔ 2021 میں چھ دنوں کے دوران تقریباً 1 لاکھ 24 ہزار ووٹ ڈالے گئے تھے، جب کہ سات دن کے مجموعی دورانیے میں 1 لاکھ 41 ہزار 329 ووٹرز نے حصہ لیا تھا۔ 2017 کے مکمل سات دنوں میں 74 ہزار 965 ووٹرز نے ووٹ دیا تھا۔
الیکشن حکام کے مطابق یہ اعداد و شمار تصدیقی عمل کے دوران اگلے دن تک معمولی تبدیلی کا شکار ہو سکتے ہیں۔مونٹ رائل یونیورسٹی کی سیاسی ماہر لوری ولیمز کا کہنا ہے کہ اس وقت ووٹرز ایک طرح کی الجھن میں ہیں کیونکہ امیدوار عام طور پر یہ واضح نہیں کر پا رہے کہ وہ کن نظریات پر کھڑے ہیں۔
انہوں نے کہا کہ ووٹروں کو یہ واضح اندازہ نہیں کہ امیدوار کن مقاصد کے لیے میدان میں ہیں یا کون سا امیدوار ان کے نظریات سے قریب تر ہے۔ میں خود بہت سے سوالات کے جوابات تلاش کر رہی ہوں، تو سوچا جا سکتا ہے کہ عام ووٹرز کے لیے فیصلہ کرنا کتنا مشکل ہے۔
ولیامز، جنہوں نے ایک میئرل مباحثہ بھی ماڈریٹ کیا، کا کہنا تھا کہ کچھ لوگ شاید اس لیے ووٹ دینے نہ جائیں کیونکہ وہ نئے سیاسی پارٹی سسٹم کے مخالف یا اس کے اثرات سے غیر یقینی میں ہیں۔
دوسری جانب مارتھا ہال فنڈلے، جو اسکول آف پبلک پالیسی کی ڈائریکٹر ہیں، کا کہنا ہے کہ اس کی ایک وجہ جاری اساتذہ کی ہڑتال بھی ہو سکتی ہے۔انہوں نے کہا کہ بہت سے والدین اپنے بچوں کے انتظامات میں مصروف ہیں، یہ شاید سب سے بڑی وجہ ہو۔
ان کا مزید کہنا تھا کہ موسم بھی کردار ادا کر سکتا ہے۔ ممکن ہے کہ لوگ برفباری سے پہلے کے آخری خوشگوار دنوں سے لطف اٹھانے میں مصروف ہوں۔انہوں نے امید ظاہر کی کہ آنے والے دنوں میں زیادہ لوگ ووٹ ڈالنے نکلیں گے کیونکہ بلدیاتی انتخابات بہت اہم ہوتے ہیں۔
اگر آپ کسی ایڈوانس پولنگ اسٹیشن تک نہیں جا سکتے تو آپ 20 اکتوبر کو عام انتخابی دن میں ووٹ دے سکتے ہیں۔مزید معلومات کے لیے الیکشنز کیلگری کی ویب سائٹ ملاحظہ کریں یا 403-476-4100 پر رابطہ کریں۔
