اردو ورلڈ کینیڈا (ویب نیوز ) امریکہ میں مختلف واقعات میں کم از کم 34 افراد ہلاک ہو چکے ہیں اور نیویارک برفانی طوفان سے سب سے زیادہ متاثر ہوا ہے۔
حکام کے مطابق کینیڈا کے مغربی صوبے برٹش کولمبیا کے شہر میرٹ میں چار افراد ہلاک ہوگئے جہاں ایک مسافر بس برفیلی سڑک پر پھسلنے کے باعث الٹ گئی۔
امریکہ میں ایری کانٹی کے ایگزیکٹو مارک پولون کارز نے خبر رساں ادارے کو بتایا کہ شدید برفانی طوفان اور شدید درجہ حرارت کی وجہ سے تقریبا سات افراد کی لاشیں گاڑیوں سے ملی ہیں۔
برفانی طوفان نے ورمونٹ، اوہائیو، مسوری، وسکونسن، کنساس اور کولوراڈو میں بھی جانیں لے لیں۔
اس کے علاوہ مینیسوٹا، آئیووا، وسکونسن اور مشی گن ریاستوں میں بھی شدید برف باری ہوئی ہے۔
امریکہ کے محکمہ موسمیات کے مطابق، بفیلو، نیویارک میں حد نگاہ صفر ہے۔
نیویارک کی گورنر کیتھی ہوچل، جن کا تعلق بفیلو شہر نے کہا کہ اس برفانی طوفان کو بفیلو شہر کی تاریخ کے بدترین طوفان کے طور پر یاد رکھا جائے گا”۔
امریکا کی مغربی ریاست مونٹانا میں اس وقت شدید سردی ہے اور وہاں درجہ حرارت منفی 50 ڈگری سینٹی گریڈ تک گر گیا ہے جب کہ کینیڈا کے صوبے اونٹاریو اور کیوبک بھی برفانی طوفان سے شدید متاثر ہوئے ہیں۔
اس طوفان سے تقریبا 25 کروڑ لوگ متاثر ہوئے ہیں۔ امریکہ کے مشرقی صوبے کیوبیک سے جنوبی ریاست ٹیکساس تک تقریبا 3200 کلومیٹر کے علاقے میں کم از کم 1.7 ملین لوگ بجلی کے بغیر زندگی گزارنے پر مجبور ہیں۔
تاہم حکام کا کہنا ہے کہ برفانی طوفان نے گزشتہ چند دنوں سے تباہی مچا رکھی ہے اور جن علاقوں میں بجلی معطل تھی ان کو بتدریج بحال کیا جا رہا ہے۔ امریکہ اور کینیڈا میں 10 لاکھ سے زائد افراد کرسمس کا دن بجلی کے بغیر گزارنے پر مجبور ہو ئے۔
شمالی امریکا میں شدید برفانی طوفان کے باعث ہزاروں پروازیں منسوخ کر دی گئیں، کرسمس کے موقع پر بھی لاکھوں لوگ اپنے پیاروں تک نہیں پہنچ سکے۔
ماہرین نے خبردار کیا ہے کہ فراسٹ بائٹ، یعنی جسم کی جلد اور ٹشوز جم سکتے ہیں اس حالت میں ناک اور ہاتھ اور پیر زیادہ تر متاثر ہوتے ہیں۔
