اردوورلڈ کینیڈا ( ویب نیوز)وفاقی حکومت نے امریکہ میں مقیم غیر ملکی کارکنوں کو کینیڈا میں مدعو کرنے کے لیے نئے ورک پرمٹ کے لیے درخواستیں طلب کی ہیں۔ اس کا آغاز اتوار سے ہوا۔
امریکہ میں رہنے والے غیر ملکی کارکن، جن کے پاس H-1B ویزا ہے، اب وہ کام کرنے اور کینیڈا میں رہنے کے لیے درخواست دے سکیں گے۔ وفاقی حکومت نے یہ نئی حکمت عملی تکنیکی کارکنوں کو راغب کرنے کے لیے بنائی ہے۔ H-1B اسپیشلٹی آکیپیشن ویزا ہولڈر ورک پرمٹ کا اعلان جون میں کیا گیا تھا،
اس کے ساتھ کئی دیگر ورکرز پرمٹس کو اپ ڈیٹ کیا گیا تھا۔ اس کے ساتھ ساتھ حکومت کی جانب سے سائنس، ٹیکنالوجی، انجینئرنگ اور ریاضی (STEM) کے شعبے میں کام کرنے والے یا تربیت یافتہ کارکنوں کو کینیڈا مدعو کرنے کے لیے ایکسپریس انٹری پروگرام بھی تیار کیا جا رہا ہے۔
درخواست دہندگان کو کچھ تفصیلات کو ذہن میں رکھنا ہوگا، جیسے کہ HB-Visa پروگرام صرف اعلیٰ تعلیم یافتہ افراد کے لیے ہے جو کسی مخصوص پیشے سے وابستہ ہیں یا اس پیشے میں کام کرنے کے لیے تربیت یافتہ ہیں۔ اس قسم کی ملازمت کے لیے اکثر اضافی تعلیم کی ضرورت ہوتی ہے جیسے بیچلر کی ڈگری یا سرٹیفیکیشن یا متعلقہ پیشے میں کام کرنے کے لیے خصوصی لائسنس۔
H-1B ویزا ہولڈر امریکہ میں تین سال تک کام کر سکتے ہیں اور رہ سکتے ہیں اور بہت کم معاملات میں، چھ سال تک۔ اس کے ساتھ ان کے شریک حیات یا غیر شادی شدہ بچے جن کی عمریں 21 سال سے کم ہیں، ان کے ساتھ رہ سکتے ہیں۔ اگرچہ وفاقی حکومت کے US H-1B ویزا ہولڈرز کو کینیڈا میں مدعو کرنے کے پروگرام کا اعلان ٹیکنالوجی کے شعبے میں کارکنوں کو راغب کرنے کے لیے کیا گیا تھا، لیکن یہ پروگرام کسی بھی پیشے میں کام کرنے والے US H-1B ویزا ہولڈرز کے لیے کھلا ہے۔ امریکی شہریت اور امیگریشن سروسز کی طرف سے منظور شدہ ملازمتوں میں سافٹ ویئر انجینئرز، گرافک ڈیزائنرز، الیکٹریکل انجینئرز کے ساتھ ساتھ ڈاکٹر، اساتذہ اور معالج شامل ہیں۔
کامیاب درخواست دہندگان کو اس پروگرام کے تحت ایک کھلا ورک پرمٹ دیا جائے گا، جو انہیں اگلے تین سال تک کینیڈا میں رہنے اور کام کرنے کی اجازت دے گا۔ کینیڈین ورک پرمٹ منسوخ نہیں کیا جائے گا اگر پرمٹ ہولڈر کو نوکری سے نکال دیا جاتا ہے یا نوکری چھوڑ دیتا ہے۔ یہ امریکی H-1B کے بالکل برعکس ہے کیونکہ امریکہ متعلقہ کارکن کو 60 دنوں کے اندر نئی نوکری تلاش کرنے یا ملک چھوڑنے کا مطالبہ کرتا ہے۔
اس پروگرام میں دلچسپی رکھنے والے امیگریشن، ریفیوجیز اینڈ سٹیزن شپ کینیڈا (IRCC) پیج پورٹل کے ذریعے درج ذیل دستاویزات جمع کر کے درخواست دے سکتے ہیں: ان کے موجودہ H-1B ویزا کی ایک کاپی، ایک نوٹس آف ایکشن فارم، جو اس بات کی تصدیق کرے گا کہ کب امریکی حکومت نے ان کے کارکن کا اجازت نامہ منظور کیا اور امریکہ میں ان کی رہائش کا ثبوت۔ درخواست گزار کو 155 کینیڈین ڈالر خرچ کر کے درخواست پُر کرنا ہو گی اور اگر یہ منظور ہو جاتی ہے تو درخواست گزار کو چھ ہفتوں کے اندر اس کے بارے میں آگاہ کر دیا جائے گا۔
