کینیڈا کی وزارت خارجہ کے مطابق حماس اور اسلامی جہاد کے 11 رہنماؤں پر پابندیاں عائد کی گئی ہیں جن میں حماس کے رہنما یحییٰ سنوار اور محمد الضعیف شامل ہیں۔کینیڈا کی وزارت خارجہ کا کہنا ہے کہ پابندیاں حماس اور اسلامی جہاد سے علاقائی سلامتی کو لاحق خطرات کے پیش نظر لگائی گئی ہیں، پابندیوں میں شامل افراد پر سفری پابندیاں اور اثاثے منجمد کیے جائیں گے۔دوسری جانب غزہ پر اسرائیلی فوج کی شدید بمباری جاری ہے، کل سے اب تک 110 سے زائد فلسطینی شہید ہوچکے ہیں۔دریں اثناء اسرائیلی آباد کاروں نے کرم ابو سالم کراسنگ سے غزہ جانے والی امداد پر حملہ کر دیا اور امدادی ٹرکوں کو غزہ جانے سے روک دیا۔آج شمالی غزہ میں خوراک کی کمی کے باعث 3 معصوم بچے شہید ہوگئے۔ اقوام متحدہ کے مطابق غزہ کے لاکھوں فلسطینی بدترین قحط کے دہانے پر پہنچ گئے ہیں۔حماس نے غزہ میں جنگ بندی اور یرغمالیوں کی رہائی کے لیے قطر اور مصر کی تجویز کا جواب دیا ہے۔قطری وزیر اعظم اور امریکی وزیر خارجہ انتھونی بلینکن نے تصدیق کی ہے کہ انہیں معاہدے کے فریم ورک کے حوالے سے حماس کی جانب سے جواب موصول ہوا ہے۔