اردوورلڈ کینیڈا ( ویب نیوز)وزیر اطلاعات و نشریات مرتضیٰ سولنگی نے کہا ہے کہ وہ پٹرولیم مصنوعات مہنگے داموں خرید کر سستے داموں فروخت کرنے کے متحمل نہیں ہو سکتے۔
نگران وفاقی کابینہ کے اجلاس کے بعد میڈیا کو بریفنگ دیتے ہوئے انہوں نے کہا کہ آج نگراں وزیراعظم کی زیر صدارت کابینہ کا پہلا اجلاس ہوا۔ وفاقی کابینہ ملک میں آزادانہ، منصفانہ اور پرامن انتخابات کے لیے پرعزم ہے۔
انتخابات کے حوالے سے ان کا کہنا تھا کہ کابینہ اجلاس کے بعد چیف الیکشن کمشنر سے ملاقات کی، چیف الیکشن کمشنر نے ملاقات میں مکمل تعاون کی یقین دہانی کرائی ہے، پہلے ووٹ نگران وزیراعظم اور پھر کابینہ کے ارکان کا ہوگا۔
وزیراطلاعات کا کہنا تھا کہ نگراں وزیراعظم انوار الحق کاکڑ نے کابینہ کے ہر رکن کو اپنی وزارت سے آگاہ کیا، وزیراعظم کی جانب سے اخراجات کم کرنے کی ہدایت، معیشت کی بحالی کے لیے کابینہ اجلاس میں کمیٹی تشکیل دی گئی۔
انہوں نے کہا کہ ریاست کی طاقت اقلیتوں کے ساتھ کھڑی ہے، تمام شہریوں کو یکساں انسانی حقوق حاصل ہیں، جڑانوالہ واقعے پر سب نے دکھ اور افسوس کا اظہار کیا ہے، کابینہ نے ملک میں تصوف کے فروغ پر زور دیا ہے۔
انہوں نے کہا کہ ہم پوری کوشش کریں گے کہ اپنے حلف کی پاسداری کریں، آئین اور قانون کے مطابق اپنی ذمہ داریاں ادا کریں۔
