اردو ورلڈ کینیڈا ( ویب نیوز ) امریکی ریاست کینٹکی میں لوئی ول ایئرپورٹ کے نزدیک ایک کارگو طیارہ پرواز بھرنے کے کچھ ہی دیر بعد گر کر تباہ ہوگیا
جس کے نتیجے میں 3 افراد جان سے گئے جبکہ 11 زخمی ہوئے۔ حادثے کے باعث قریبی عمارتوں میں آگ بھڑک اٹھی اور علاقے میں دھوئیں کے گھنے بادل دکھائی دیے۔رپورٹس کے مطابق کارگو طیارہ ہونولولو کے ڈینیئل کےانوئے انٹرنیشنل ایئرپورٹ کی جانب روانہ تھا۔ لوئی ول کے میئر نے بتایا کہ طیارے میں تقریباً 2 لاکھ 80 ہزار گیلن ایندھن موجود تھا، جس کی وجہ سے آگ تیزی سے پھیلی۔
سوشل میڈیا پر سامنے آنے والی ویڈیوز میں جائے حادثہ پر شدید آگ اور دور تک اٹھتے دھوئیں کے مناظر دیکھے جا سکتے ہیں۔ واقعے کے بعد ایئرپورٹ نے تمام ان کمنگ اور آؤٹ گوئنگ فلائٹس عارضی طور پر روک دی ہیں، جبکہ حکام نے ایئرپورٹ سے تقریباً 5 میل دور ہنگامی پناہ گاہیں قائم کرنے کی ہدایت کی ہے۔ریسکیو اور فائر فائٹرز کے عملے کی کارروائیاں جاری ہیں، تاہم حادثے کی وجہ تاحال سامنے نہیں آسکی۔ نیشنل ٹرانسپورٹ سیفٹی بورڈ نے واقعے کی باقاعدہ تحقیقات شروع کر دی ہیں۔
