اردو ورلڈ کینیڈا ( ویب نیوز)مسلم لیگ ق نے مونس الٰہی، حسین الٰہی اور کامل علی آغا کو شوکاز نوٹس جاری کرتے ہوئے وزیراعلیٰ چوہدری پرویز الٰہی کی پارٹی رکنیت معطل کردی۔
مسلم لیگ ق کا ہنگامی اجلاس چوہدری شجاعت حسین کی زیر صدارت ہوا، اجلاس میں طارق بشیر چیمہ، سالک حسین نے بھی شرکت کی۔
اجلاس میں چوہدری پرویز الٰہی کے گزشتہ رات دیئے گئے بیانات کا نوٹس لیا گیا، بیان کا جائزہ لینے کے بعد ان کی پارٹی رکنیت معطل کرنے کا فیصلہ کیا گیا۔
مسلم لیگ ق کے اجلاس میں پرویز الٰہی کی رکنیت معطل کر کے 7 روز میں جواب طلب کر لیا گیا اور موقف اختیار کیا گیا کہ صوبائی صدر پارٹی کو تحریک انصاف میں ضم نہیں کر سکتے، پارٹی نے شوکاز جاری کر دیا چوہدری پرویز الٰہی سے وضاحت طلب کرلی گئ
مسلم لیگ ق کے سیکرٹری جنرل طارق بشیر چیمہ نے مونس الٰہی، حسین الٰہی اور سینیٹر کامل علی آغا کو بھی شوکاز نوٹس جاری کردیا۔
نوٹس میں کہا گیا ہے کہ اگر آپ دوسری پارٹی میں جارہے ہیں تو استعفیٰ دیں، عہدے پارٹی کی امانت ہیں، استعفیٰ نہ دیا تو آپ کو ڈی سیٹ کردیا جائے گا، فوری طور پر اپنی پوزیشن واضح کریں۔
