اردوورلڈکینیڈا( ویب نیوز)وزیراعلیٰ پنجاب مریم نواز شریف نے بے سہارا بیواؤں کی جائیدادوں پر ناجائز قبضے کے فوری ازالے کے لیے سخت اقدامات کی ہدایت کر دی ہے۔ انہوں نے آرڈیننس 2025ء کے مکمل نفاذ کو یقینی بنانے اور ہر کیس کی روزانہ مانیٹرنگ کا حکم دیا ہے، جس کی رپورٹ براہِ راست وزیراعلیٰ کو پیش کی جائے گی۔

وزیراعلیٰ نے تمام اضلاع کے ڈپٹی کمشنرز کو ہدایت کی ہے کہ وہ روزانہ District Review Committee (DRC) کے اجلاس کریں اور قبضے کے مقدمات کی پیش رفت پر فوری کارروائی یقینی بنائیں۔ مریم نواز شریف خود بھی کیسز کی مانیٹرنگ کریں گی اور صورتحال کا جائزہ لیں گی۔

اس کے علاوہ، عوام کو اقدامات سے آگاہ کرنے کے لیے مساجد میں اعلانات کیے جائیں گے تاکہ لوگوں کو اطلاع مل سکے کہ قبضے کے خلاف فوری کارروائی ہو رہی ہے۔ ہر تحصیل میں اسسٹنٹ کمشنر آفس میں بھی بیواؤں اور متاثرہ افراد کی درخواستیں وصول کی جائیں گی تاکہ جائیدادوں پر قبضے کے مقدمات جلد نمٹائے جا سکیں۔

وزیراعلیٰ نے گجرات، لیہ، حافظ آباد اور دیگر اضلاع میں قبضے کے مقدمات میں تاخیر پر ناپسندیدگی کا اظہار کیا اور کہا کہ عوام کو فوری ریلیف فراہم کرنا حکومت کی اولین ترجیح ہے۔ انہوں نے ڈپٹی کمشنرز کو سختی سے ہدایت کی کہ وہ ہر کیس پر روزانہ اجلاس کریں اور مقدمات کی بروقت نمٹارہ یقینی بنائیں۔

مریم نواز شریف کا کہنا تھا کہ ناجائز قبضے کے خلاف فوری اقدامات سے بے سہارا بیواؤں کو ریلیف ملے گا اور حکومت عوام کے تحفظ اور جائیدادوں کے حقوق کو یقینی بنانے کے لیے پرعزم ہے۔