اردو ورلڈ کینیڈا ( ویب نیوز)پاک بحریہ کے زیر اہتمام آٹھویں کثیرالقومی بحری امن مشق کا آغاز ہوگیا، مشقیں 14 فروری تک جاری رہیں گی۔
تفصیلات کے مطابق پاک بحریہ کے زیراہتمام 8ویں کثیر القومی میری ٹائم امن مشق میں 50 سے زائد ممالک کے نمائندے بحریہ کے اثاثوں، مبصرین اور اعلیٰ افسران کے ہمراہ شرکت کر رہے ہیں۔
تقریب کے مہمان خصوصی کمانڈر پاکستان فلیٹ وائس ایڈمرل اویس احمد بلگرامی تھے، پاک بحریہ کے سربراہ محمد امجد خان نیازی کا پیغام پڑھ کر سنایا گیا۔
پاک بحریہ کے سربراہ محمد امجد خان نیازی نے اپنے پیغام میں کہا کہ امن مشقوں میں 50 ممالک کے دوستوں کو خوش آمدید کہتے ہیں، امن، ہم آہنگی اور استحکام کے لیے آگے بڑھنے والوں کو خوش آمدید کہتے ہیں، ان مشقوں کا مقصد علاقائی امن و سلامتی ہے۔
نیول چیف نے کہا کہ پاکستان نیوی عالمی امن و سلامتی کے لیے فرنٹ لائن کے طور پر کام کر رہی ہے، میری ٹائم سیکیورٹی کو بے مثال خطرات کا سامنا ہے، موسمیاتی تبدیلی کے سمندری ماحول پر گہرے اثرات مرتب ہوئے ہیں۔
تقریب سے خطاب کرتے ہوئے مہمان خصوصی کمانڈر پاکستان فلیٹ وائس ایڈمرل اویس احمد بلگرامی نے کہا کہ تمام معزز مہمانوں کو خوش آمدید کہتے ہیں، میری ٹائم سیکیورٹی تمام ممالک کے لیے بہت اہم ہے، ہمیں میری ٹائم سیکیورٹی کے لیے مل کر کام کرنا ہوگا
وائس ایڈمرل اویس احمد بلگرامی نے کہا کہ امن مشق کا مقصد دوستی اور شراکت داری کو فروغ دینا ہے۔ خوفناک زلزلے میں جانی نقصان پر افسوس ہے۔
واضح رہے کہ امن مشقیں ہر دو سال بعد منعقد ہوتی ہیں، پہلی مشق 2007 میں منعقد ہوئی، ہر خطے سے بحری افواج کو اکٹھا کرنا پاک بحریہ کا بڑا اعزاز ہے۔
