اردوورلڈکینیڈا( ویب نیوز)امریکی پاپ گلوکارہ کیٹی پیری اور کینیڈا کے سابق وزیراعظم جسٹن ٹروڈو کے درمیان تعلقات کی خبروں کی باقاعدہ تصدیق ہوگئی ہے۔

سوشل میڈیا پر وائرل ہونے والی ایک ویڈیو میں دونوں کو کیلیفورنیا کے ساحلی علاقے سانتا باربرا کے قریب پیری کی یاٹ "کاراول” (Caravelle) پر ایک دوسرے کے ساتھ خوشگوار لمحات گزارتے ہوئے دیکھا جا سکتا ہے۔

ویڈیو میں واضح طور پر نظر آتا ہے کہ 40 سالہ کیٹی پیری اور 53 سالہ جسٹن ٹروڈو یاٹ کے بالائی حصے میں ایک دوسرے کو گلے لگاتے اور بوسہ لیتے ہوئے موجود ہیں، جس سے طویل عرصے سے گردش کرنے والی افواہیں درست ثابت ہو گئی ہیں۔

دونوں نہایت پُرسکون دکھائی دیے اور آس پاس موجود سیاحوں کی موجودگی سے بالکل بے نیاز رہے۔ اس دوران کیٹی پیری سیاہ رنگ کے سوئمنگ سوٹ میں نظر آئیں جبکہ ٹروڈو کو ان کی پیٹھ پر ہاتھ رکھے دیکھا گیا۔

ایک عینی شاہد کے مطابق، ٹروڈو کو ان کے بازو پر بنے مخصوص "Haida Raven” ٹیٹو سے پہچانا گیا، جو کینیڈا کی مقامی تہذیب سے ان کے تعلق کی علامت سمجھا جاتا ہے۔

یاد رہے کہ کیٹی پیری ان دنوں اپنے ورلڈ ٹور میں مصروف ہیں، جس سے وہ اب تک تقریباً 8 کروڑ امریکی ڈالر کما چکی ہیں۔

دوسری جانب جسٹن ٹروڈو نے تقریباً دس سال وزارتِ عظمیٰ پر فائز رہنے کے بعد رواں سال استعفیٰ دیا تھا۔ وہ اگست 2023 میں اپنی اہلیہ صوفی گریگوار سے علیحدہ ہوگئے تھے۔ ان کے تین بچے ہیں: 18 سالہ زیویئر، 16 سالہ ایلا گریس اور 11 سالہ ہیڈریئن۔

ادھر کیٹی پیری کی ایک پانچ سالہ بیٹی ڈیسی ڈوو بلوم ہے، جو ان کے سابق منگیتر اداکار اورلینڈو بلوم سے ہے۔ پیری اور بلوم نے رواں سال اپنی نو سالہ رفاقت ختم کی، جب کہ اس سے قبل وہ 2010 سے 2012 تک کامیڈین رسل برانڈ کی شریکِ حیات رہ چکی ہیں۔

پیری اور ٹروڈو کے درمیان رومانس کی خبریں جولائی میں اُس وقت سامنے آئیں جب دونوں کو مونٹریال کے ایک معروف ریستوران Le Violon میں ایک ساتھ کھانا کھاتے دیکھا گیا تھا۔