اردو ورلڈ کینیڈا (ویب نیوز ) فلسطینی وزارت صحت نے تصدیق کی ہے کہ غزہ کے پناہ گزین کیمپوں میں سیوریج اور آلودہ پانی میں پولیو وائرس پایا گیا ہے۔غیر ملکی میڈیا رپورٹس کے مطابق غزہ کے پناہ گزین کیمپوں میں سیوریج اور آلودہ پانی میں پولیو وائرس کی تصدیق کے بعد اسرائیلی فورسز نے اپنے فوجیوں کو پولیو ویکسین دینا شروع کر دی ۔
دوسری جانب آکسفیم کی رپورٹ میں کہا گیا ہے کہ اسرائیل نے غزہ میں دستیاب پانی کی مقدار میں 94 فیصد کمی کی ہے جس سے صحت کی مہلک تباہی ہوئی ہے۔ اس کے علاوہ، ریڈ کراس نے ایک بیان میں کہا کہ جنوبی غزہ کے ہسپتال ‘بریکنگ پوائنٹ’ پر ہیں، جبکہ UNRWA کے مطابق، غزہ میں UNRWA کے 26 مراکز صحت میں سے صرف 10 کام کر رہے ہیں۔یاد رہے کہ 7 اکتوبر سے اب تک غزہ میں جاری اسرائیلی جارحیت میں 38 ہزار سے زائد فلسطینی جن میں بڑی تعداد میں بچے اور خواتین بھی شامل ہیں شہید ہو چکے ہیں۔فلسطینی پناہ گزینوں کے لیے کام کرنے والی اقوام متحدہ کی ایجنسی یو این آر ڈبلیو اے کا کہنا ہے کہ غزہ میں اسرائیلی حملے سے پیدا ہونے والے ملبے کو صاف کرنے میں 15 سال لگ سکتے ہیں۔
