اردوورلڈ کینیڈا ( ویب نیوز)نگران وزیراعظم انوارالحق کاکڑ نے کہا ہے کہ ملک میں معاشی پالیسیوں کا تسلسل برقرار رہے گا اور مزید معاشی بہتری لائیں گے۔نگرا ن وزیراعظم انوارالحق کاکڑ کی زیرصدارت اجلاس میں مختلف وزارتوں کے اہم امور پر بریفنگ دی گئی۔اجلاس سے خطاب کرتے ہوئے نگراں وزیراعظم نے کہا کہ عوامی فلاح و بہبود کے منصوبے بلا تعطل جاری رہیں گے،
خصوصی سرمایہ کاری سہولت کونسل کے تحت ملک میں غیر ملکی سرمایہ کاری بڑھانے کے اقدامات نگران حکومت کی ترجیحات میں شامل ہیں۔انوار الحق کاکڑ نے ہدایت کی کہ صحت اور تعلیم کے شعبے میں بین الاقوامی معیار کی سہولیات کی فراہمی کو یقینی بنایا جائے، پاور سیکٹر میں جاری اصلاحات پر عملدرآمد کو تیز کیا جائے۔
وزیراعظم نے کہا کہ ٹیکس ریونیو بڑھانے کے اقدامات پر سختی سے عمل کیا جائے، انہوں نے کہا کہ حکومت معیشت کی بہتری کے لیے ڈی ریگولیشن اور ذمہ دارانہ خود مختاری پر توجہ دے گی۔
انہوں نے کہا کہ نگراں حکومت اپنی محدود مدت میں معیشت کی اصلاح پر اپنی تمام تر توانائیاں صرف کرے گی۔
قبل ازیں نگراں وزیراعظم انوارالحق کاکڑ کو نیشنل ہائی وے اتھارٹی کے جاری ترقیاتی منصوبوں پر تفصیلی بریفنگ دی گئی جس پر انہوں نے کہا کہ کسی بھی ملک کی ترقی کے لیے بہترین انفراسٹرکچر کلیدی حیثیت رکھتا ہے
