اردو ورلڈ کینیڈا ( ویب نیوز )وزیراعظم شہباز شریف نے کہا ہے کہ بزدل عدالت میں اس لیے تلاشی نہیں لیتا کہ وہ مجرم ہے، عمران خان ملک میں عدم استحکام کی آگ بھڑکانا چاہتے ہیں۔
اپنے ایک بیان میں وزیراعظم شہباز شریف نے کہا کہ عمران خان اپنے ہی آئی ایم ایف پروگرام کی بحالی کو ناکام بنانے کی کوشش کر رہے ہیں، سڑکوں پر انتشار اور ہنگامے اس ایجنڈے کا حصہ ہیں، وہ نہیں چاہتے کہ مہنگائی، معاشی دبا ئوسے نجات حاصل کریں اور پاکستان کے لیے وسائل کی راہ ہموار کریں۔ عمران خان کا عدالتوں سے بھاگنا بزدلی کی انتہا ہے وہ پہلے آئی ایم پروگرام سے بھاگا۔ اب عدالتوں سے بھا گ رہا ہے قبل ازیں اجلاس کی صدارت کرتے ہوئے وزیراعظم نے کہا کہ ملکی زرعی پیداوار میں بہتری لا کر خوراک میں خود کفالت پاکستان کو کئی معاشی مسائل سے بچا سکتی ہے۔ درپیش مسائل کو جامع حکمت عملی کے تحت موثر انداز میں حل کیا جائے، زرعی اصلاحات پر کام جلد از جلد مکمل کیا جائے گا۔
وزیر اعظم شہباز شریف نے مزید کہا کہ وفاقی اور صوبائی سطح پر زرعی تحقیقی اداروں کو فعال بنایا جائے۔ افسوس کی بات ہے کہ زرعی ملک ہونے کے باوجود زرعی اجناس درآمد کرنا پڑتی ہیں۔ فصلوں کو منافع بخش بنانے کے لیے حکومت اس بات کو یقینی بنائے گی کہ کسانوں کو ان کی فصلوں کی مناسب قیمت ادا کی جائے۔
