اردو ورلڈ کینیڈا ( ویب نیوز)گاڑی کی ٹکر سے سائیکل سوار جاں بحق۔ ٹورنٹو کے وسط میں ایک گاڑی کی ٹکر سے ایک سائیکل سوار کی موت ہو گئی۔

پولیس نے بتایا کہ ساڑھے چار بجے سے پہلے انہیں یہ خبر ملی کہ ایک سائیکل سوار کو گاڑی نے ٹکر مار دی ہے اور گاڑی اس شخص کے اوپر سے چڑھ گئی ہے۔ یہ اطلاع ملنے کے بعد پولیس ینگ اسٹریٹ اور سینٹ کلیئر ایونیو کے چوراہے پر پہنچی۔

پولیس کا کہنا تھا کہ اس سے پہلے کہ وہ جائے وقوعہ پر پہنچیں، فائر بریگیڈ کا عملہ اور پیرا میڈیکس موقع پر پہنچ چکے تھے اور سائیکل سوار کو گاڑی کے نیچے سے نکالنے کی کوشش کر رہے تھے۔ لیکن اسے موقع پر ہی مردہ قرار دے دیا گیا۔ گاڑی کا ڈرائیور بھی جائے حادثہ پر موجود رہا۔