ارد ورلڈ کینیڈا ( ویب نیوز ) بابا دیپ سنگھ جی گٹکا اکھاڑہ نے تیسری سالانہ دمدما گٹکا چیمپئن شپ 2025 کا اعلان کر دیا ہے۔
جو 5 اور 6 جولائی کو سرے کے کلورڈیل ایگریپلیکس (17798، 62 ویں ایونیو) میں منعقد ہوگی۔ یہ چیمپئن شپ ہر روز صبح 8 بجے سے رات 9:30 بجے تک جاری رہے گی۔اس شاندار ایونٹ میں شمالی امریکہ بھر سے 72 ماہر گٹکا کھلاڑی شرکت کریں گے، جو سکھوں کے اس قدیم مارشل آرٹ کی مہارت اور روحانی اقدار کا مظاہرہ کریں گے۔ منتظمین کے مطابق، یہ چیمپئن شپ اب تک کی سب سے زیادہ مسابقتی اور منفرد مقابلہ تصور کی جا رہی ہے، جس میں 2024 کے فاتحین بھی اپنی فتوحات کا دفاع کرنے کے لیے میدان میں اتریں گے۔چیمپئن شپ میں "فری اسٹک کے ذریعے دو منٹ کے ون آن ون مقابلے ہوں گے۔ ابتدائی گروپ مرحلے کے مقابلے ہفتہ، 5 جولائی کو ہوں گے، جبکہ پلے آف اور ایلیمینیشن راؤنڈز اتوار، 6 جولائی کو منعقد کیے جائیں گے۔
ایونٹ میں شمولیت تمام افراد کے لیے مفت ہے، تاکہ زیادہ سے زیادہ لوگ سکھ روایات، ثقافت اور مارشل آرٹ سے مستفید ہو سکیں۔ تماشائی نہ صرف دلچسپ مقابلے دیکھ سکیں گے بلکہ متحرک بازار میں بھی شریک ہو سکیں گے، جہاں سکھ آرٹ، ادبی مواد، کپڑے، مقامی و بین الاقوامی دستکاروں کی مصنوعات، اور مختلف کمیونٹی آرگنائزیشنز کے اسٹالز بھی ہوں گے۔اس چیمپئن شپ کو ٹی وی اور آن لائن پلیٹ فارمز پر براہِ راست نشر کیا جائے گا، جہاں معروف سکھ میڈیا شخصیات اور گٹکا کے سینئر اساتذہ خصوصی تبصرے پیش کریں گے، جو اس پروگرام کو مزید متاثر کن بنائے گا۔شہید بابا دیپ سنگھ جی گٹکا اکھاڑہ کی بنیاد 2003 میں سرے میں بھائی پرمیندر سنگھ جی اور بھائی چرنجیت سنگھ جی نے رکھی تھی۔ یہ ادارہ سکھ جنگجو روایات کی ترویج کے لیے وقف ہے اور مقامی، قومی و بین الاقوامی سطح پر نمایاں خدمات انجام دے چکا ہے۔گٹکا نہ صرف جسمانی اور ذہنی تربیت کا ذریعہ ہے بلکہ یہ سکھ نوجوانوں کو ان کے روحانی و ثقافتی ورثے سے جوڑنے کا ایک اہم ذریعہ بھی ہے۔ یہ چیمپئن شپ نئی نسل کو اپنے دفاع اور خدمت خلق جیسے اہم اصولوں کی اہمیت سے روشناس کرانے کا ایک سنہری موقع ہے۔تمام کمیونٹیز سے وابستہ افراد کو اس عظیم ثقافتی و کھیلوں کے میلے میں شرکت کی بھرپور دعوت دی جاتی ہے۔
