تفصیلات کے مطابق پاکستان مسلم لیگ (ن) میں سینئر رہنماؤں کے درمیان اختلافات کے باعث مختلف اضلاع میں پارٹی کو سیاسی نقصان کا خدشہ ہے۔
پنجاب کے ضلع نارووال میں احسن اقبال اور دانیال عزیز کے درمیان ہونے والی لڑائی سے مقامی سیاست میں مسلم لیگ ن کو بڑا دھچکا لگنے کا امکان ہے۔ پارٹی قیادت نے نواز شریف کی حمایت کرنے والے سینئر لیگی رہنما دانیال عزیز کو شوکاز نوٹس جاری کیا اور انہیں 5 سال کے لیے نااہل قرار دیا گیا، جس پر حلقے کے عوام نے شدید احتجاج کیا۔
(ن) لیگ ذرائع کے مطابق علاقہ مکینوں اور اہم قریبی ساتھیوں نے دانیال عزیز کو آزاد حیثیت میں الیکشن لڑنے کا مشورہ دیا ہے جب کہ علاقے کی بااثر شخصیات، برادریوں اور پی ٹی آئی کی مقامی قیادت نے بھی الیکشن لڑنے کی صورت میں دانیال عزیز کی حمایت کی یقین دہانی کرائی ہے
لیگی ذرائع کا کہنا ہے کہ اگر دانیال عزیز آزاد حیثیت سے الیکشن لڑتے ہیں تو وہ اپنے پورے پینل کے ساتھ میدان میں اتریں گے، جب کہ وہ قومی اور صوبائی اسمبلی کے حلقوں کے لیے اپنے ساتھیوں کے ناموں کا اعلان بھی کر سکتے ہیں۔
دوسری جانب دانیال عزیز نے اس حوالے سے تاحال کوئی تردید یا تصدیق نہیں کی تاہم انہوں نے لیگی قیادت کا نام لیے بغیر کارکردگی کی بنیاد پر چند شخصیات کو تنقید کا نشانہ بنایا ہے۔
