اردو ورلڈ کینیڈا ( ویب نیوز ) امریکی صدر جو بائیڈن نے سزائے موت کے 37 قیدیوں کی سزاؤں کو عمر قید میں تبدیل کر دیا۔

امریکی میڈیا کے مطابق صدر جو بائیڈن نے 37 وفاقی قیدیوں کی سزائے موت کو عمر قید میں تبدیل کر دیا۔ صدارتی اعلان نے پھانسی کے منتظر وفاقی قیدیوں کی تعداد کم کر کے تین کر دی ہے۔امریکی میڈیا کے مطابق صدر جو بائیڈن کا کہنا ہے کہ یہ تبدیلیاں میری انتظامیہ کی وفاقی سزائے موت پر پابندی سے مطابقت رکھتی ہیں۔

بائیڈن کا کہنا ہے کہ دہشت گردی اور اجتماعی قتل کے مجرموں کے لیے سزائے موت برقرار رہے گی۔امریکی میڈیا کے مطابق 2013 کے بوسٹن میراتھن بم دھماکے کے مجرم زوخر سارنائیف کی سزائے موت برقرار ہے۔اس کے علاوہ جنوبی کیرولینا میں سیاہ فام چرچ پر حملے کے مجرم ڈیلن روف کی سزائے موت کو بھی برقرار رکھا گیا ہے۔اس کے علاوہ پٹسبرگ میں عبادت گاہ پر حملے کے مجرم رابرٹ بوورز کی سزائے موت کو بھی برقرار رکھا گیا ہے۔