اردوورلڈکینیڈا( ویب نیوز)وفاقی حکومت نے امریکی ٹیرف سے متاثر کینیڈا کی اسٹیل صنعت کی حفاظت کے لیے غیر ملکی اسٹیل کی درآمدات کم کرنے اور صوبوں کے درمیان ریلوے فریٹ ریٹ نصف کرنے کا فیصلہ کیا ہے۔
ایک سرکاری عہدیدار نے، جو اعلان سے پہلے تفصیل بتانے کا مجاز نہیں تھا، کینیڈین پریس کو بتایا کہ وزیر اعظم مارک کارنی بدھ کے روز نئی حفاظتی اقدامات کا اعلان کریں گے۔ وزیر اعظم کے شیڈول میں لکھا ہے کہ وہ کینیڈا کی اسٹریٹجک صنعتوں کو محفوظ اور جدید بنانے کے لیے نئے اقدامات کا اعلان کریں گے۔
سرکاری عہدیدار کے مطابق حکومت ان ملکوں سے اسٹیل کی درآمدات میں کمی کرے گی جن سے کینیڈا کا فری ٹریڈ معاہدہ موجود نہیں۔ درآمدات کو 2024 کی سطح کے پچاس فیصد سے کم کرکے بیس فیصد تک لایا جائے گا۔ اس اقدام کا مقصد یہ ہے کہ ملکی اسٹیل کمپنیاں اندرون ملک طلب کو پورا کر سکیں جس سے تقریباً آٹھ سو چون ملیئن ڈالر کے مساوی مقامی مانگ کھلنے کا امکان ہے۔
جولائی میں کارنی نے فری ٹریڈ معاہدے نہ رکھنے والے ممالک کے لیے کوٹا پچاس فیصد تک کم کر دیا تھا اور اس سے زیادہ درآمدات پر پچاس فیصد ٹیرف لگا دیا تھا۔ اب ان ممالک کے لیے یہ حد مزید گھٹا دی جائے گی۔ اسی طرح فری ٹریڈ معاہدہ رکھنے والے ممالک سے آنے والی درآمدات میں بھی کمی کی جائے گی تاہم مقدار ابھی واضح نہیں۔ جولائی میں حکومت نے ان ممالک سے آنے والی اضافی درآمدات پر بھی پچاس فیصد ٹیرف لگا دیا تھا سوائے امریکہ کے۔
حکومت سی این ریلوے کے ساتھ مل کر اسٹیل کی بین الصوبائی ترسیل کے فریٹ ریٹ پچاس فیصد کم کرنے کے لیے بھی کام کرے گی۔ اگر ریلوے کمپنی ریٹ کم نہ کر سکی تو وفاقی حکومت فرق کی رقم سبسڈی کے طور پر ادا کرے گی۔
یہ واضح نہیں کہ یہی سہولت شمالی علاقوں تک جانے والے اسٹیل پر بھی لاگو ہوگی یا نہیں۔ شمالی علاقوں میں تعمیراتی سامان صرف مخصوص موسم میں بحری جہازوں کے ذریعے نوناووٹ جاتا ہے جبکہ نارتھ ویسٹ ٹیریٹریز اور یوکون تک زیادہ تر سامان ٹرک کے ذریعے پہنچتا ہے۔
یہ تمام اقدامات ایسے وقت میں سامنے آئے ہیں جب امریکی صدر ڈونلڈ ٹرمپ نے جون میں کینیڈین اسٹیل پر پچاس فیصد ٹیرف لگا کر صنعت کو شدید نقصان پہنچایا ہے۔ ٹرمپ نے گزشتہ ماہ کینیڈا سے تجارتی مذاکرات بھی روک دیے تھے جب اونٹاریو حکومت نے امریکی ٹی وی چینلز پر ایسے اشتہارات چلائے جن میں سابق امریکی صدر رونالڈ ریگن کی 1987 کی تقریر کا حوالہ دے کر ٹیرف کے نقصان کو اجاگر کیا گیا تھا۔
کارنی نے منگل کے روز پارلیمنٹ میں کہا تھا کہ اس ہفتے اسٹیل، آٹو اور لکڑی کی صنعتوں کے لیے مدد فراہم کی جائے گی۔ یہ بیان اس وقت آیا جب رہنمائے حزب اختلاف نے ان سے ٹرمپ کے ساتھ آخری بار رابطے کے بارے میں کیے گئے تبصرے پر تنقید کی تھی جس میں کارنی نے کہا تھا کہ کون پرواہ کرتا ہے۔سرکاری عہدیدار کے مطابق بدھ کو نرم لکڑی کی صنعت کے لیے معاونت کا اعلان بھی متوقع ہے۔
