اردوورلڈ کینیڈا ( ویب نیوز)پاکستان تحریک انصاف (پی ٹی آئی) کے چیئرمین عمران خان کو گرفتار کرنے کا فیصلہ کیا گیا ہے۔

ایف آئی اے ذرائع کے مطابق وزارت داخلہ کی ہدایات پر ایف آئی اے لاہور کی 4 رکنی ٹیم تشکیل دی گئی ہے۔ ڈائریکٹر ایف آئی اے لاہور سرفراز خان ورک کی سربراہی میں ٹیم مقامی پولیس کی مدد سے عمران خان کو گرفتار کرے گی۔ عمران خان کو گرفتاری کے بعد اسلام آباد  ٹیم کے حوالے کیا جائے گا۔

ایف آئی اے ذرائع کا کہنا ہے کہ ایف آئی اے کی ٹیم نے پہلے عمران خان کو زمان پارک سے گرفتار کرنے کا منصوبہ بنایا تھا تاہم کارکنوں کے شدید ردعمل کو دیکھتے ہوئے اب انہیں ہائیکورٹ میں پیشی کے بعد گرفتار کیا جائے گا۔ اس حوالے سے ایف آئی اے اور پولیس نے تیاریاں مکمل کر لی ہیں۔

پولیس ایف آئی اے کو ہر ممکن تعاون فراہم کرے گی۔ ایف آئی اے اور پولیس کے اعلیٰ حکام نے اس حوالے سے وکلا کی مختلف تنظیموں سے مشاورت بھی مکمل کر لی ہے تاکہ وکلاء کے درمیان کوئی تصادم نہ ہو۔